ԱՄՆ-ը և ՆԱՏՕ-ն 14 ամսվա ընթացքում ամբողջությամբ դուրս կբերեն զորքերը Աֆղանստանից՝ ասվում է համատեղ հայտարարության մեջ, որի տեքստը հրապարակել է Tolo News-ը:
«Միացյալ Նահանգները, նրա դաշնակիցները և Կոալիցիան կավարտեն մնացած ուժերի դուրսբերումը Աֆղանստանից ԱՄՆ-ի և Թալիբանի միջև համաձայնագրի կնքման արդյունքում համատեղ հռչակագրի հայտարարությունից հետո 14-ամսյա ժամկետում», – ասվում է տեքստում:
Հայտարարության մեջ նշվում է նաև, որ Միացյալ Նահանգները դուրս կբերի իր ուժերը մնացած ռազմաբազաներից և Աֆղանստանում զորքերի քանակը կհասցնի 8600-ի Թալիբանի հետ պայմանավորվածությունից հետո 135 օրվա ընթացքում:
Ավելի վաղ հայտարարվել էր, որ Դոհայում Աֆղանստանի հարցով ԱՄՆ հատուկ ներկայացուցիչ Զալմայ Խալիլզադը և «Թալիբան» շարժման ղեկավարի տեղակալ Մուլլահ Աբդուլլահ Գանի Բարադարը խաղաղության պայմանագիր են ստորագրել ԱՄՆ-ի և Թալիբանի միջև։
