Ռուս-վրացական հակամարտությունը խաղաղ ճանապարհով լուծելու մտադրությունն ապացուցելու համար Վրաստանը հանդես է գալիս միակողմանի նախաձեռնությամբ և հայտարարում է, որ Վրաստանը երբեք ուժ չի կիրառի տարածքային ամբողջականությունը վերականգնելու համար: Այդ մասին, ինչպես հաղորդում է Грузия Online-ը, հայտարարել է Վրաստանի նախագահ Միխեիլ Սաակաշվիլին՝ այսօր ելույթ ունենալով Եվրախորհրդարանի ամբիոնից:
«Ապացուցելու համար, որ Վրաստանը ՌԴ հետ հակամարտության խաղաղ լուծում է ցանկանում, այսօր մենք հանդես ենք գալիս միակողմանի նախաձեռնությամբ և հայտարարում, որ Վրաստանը երբեք ուժ չի կիրառի տարածքային ամբողջականությունը և ինքնիշխանությունը վերականգնելու համար, որ նա միայն խաղաղ միջոցներ կօգտագործի ապաօկուպացում և միավորում իրականացնելու համար»,- ասել է Սաակաշվիլին, որի ելույթը հաղորդվել է Ռուսթավի-2 հեռուստաընկերության ուղիղ եթերում:
Նրա խոսքով, «եթե նույնիսկ ՌԴ-ն հրաժարվի օկուպացիոն զորքերի դուրսբերումից, եթե նրա օկուպացիոն ջոկատները կրկնապատկեն մարդու իրավունքների խախտումը, Վրաստանն իրեն միայն պաշտպանության իրավունք կվերապահի այն 80 տոկոս տարածքի վրա հարձակման դեպքում, որը վերահսկում է Վրաստանի կառավարությունը»:
«Իմ առաջարկությունը իմ երկրի հռչակագիրն է, բայց բոլորը պետք Է իմանան, թե մեզ որքան դժվար ու ծանր էր նման որոշում ընդունելը, երբ երկրում 500 հազար փախստական կա… Մենք պատրաստ ենք շարունակել ժնևյան բանակցությունները, պատրաստ ենք նաև քաղաքական երկխոսության, քանի որ այսօր տարածաշրջանի իրադրությունն անկայուն է: Մենք ցանկանում ենք մեր ընդդիմախոսներին ներգրավել բանակցություններում»,- ընդգծել է Սաակաշվիլին: Միաժամանակ Սաակաշվիլին կոչ է արել Եվրամիությանը՝ «ասել ճշմարտությունը» և ճանաչել Վրաստանի բռնազավթումը և վրաց բնակչության էթնիկ զտման փաստը: «Այդ ճշմարտությունը հարկավոր է, որպեսզի զավթիչը և ամբողջ աշխարհն իմանան, որ Վրաստանը բռնազավթված է»,- ասել է Վրաստանի նախագահը: