Օլիմպիական խաղերի արծաթե մեդալակիր, աշխարհի, Եվրոպայի չեմպիոն, հունահռոմեական ոճի ըմբիշ, ԱԺ պատգամավոր Արսեն Ջուլֆալակյանը երեկ լրագրողների հետ հանդիպմանը հանդես եկավ հայտարարությամբ, որը մտահոգիչ լինելուց բացի՝ պահանջում է անհապաղ արձագանք մարզաշխարհի ղեկավար անձանց կողմից։ Մասնավորապես, Ջուլֆալակյանը նշել էր, որ իր և ըմբշամարտի Հայաստանի հավաքականի որոշ անդամների ներկայությունը նույն վայրում ուղղակի հնարավոր չէ, քանզի միտումնավոր վնասվածք հասցնելուց զատ՝ կարող է նաև իր առողջությանը վնաս պատճառվել:
«Ես վտանգներ եմ տեսնում հավաքականի հետ ընդհանուր մարզման դեպքում, ինչպես, օրինակ, վնասվածքի, սննդի անվտանգության տեսանկյունից և պարզապես հոգեբանական վիճակի հետ կապված: Ես ստիպված եմ բացակայում հավաքներից: Արդյունքում ինձ համար առավել անբարենպաստ պայմաններ են ստեղծվել, քանի որ զույգ չունեմ մարզվելու համար, մյուս ամեն ինչ իմ հաշվին է լինում։ Նման պայմաններում ուղղակի գնալ, ներկա լինել և վնասել ինքս ինձ, արդյունքում վնասել երկրի հաջողությունը, չեմ կարող թույլ տալ»,- նշել էր Ջուլֆալակյանը։
Նշենք, որ ըմբշամարտը հայկական սպորտի հենակետային մարզաձևերից մեկն է։ Անկախ Հայաստանն ունի երկու օլիմպիական չեմպիոններ, և նրանք ըմբիշներ են։ Խոսքը Արմեն Նազարյանի և Արթուր Ալեքսանյանի մասին է։ Ըմբշամարտի հավաքականը մշտապես եղել է և կլինի հասարակության ուշադրության կենտրոնում։ Յուրաքանչյուր մեծ մրցաշարում բոլորս կանգնում ենք մեր ըմբիշների կողքին և հպարտանում նրանց հաջողություններով։ Այսօր, սակայն, մեր ամենատիտղոսակիր ըմբիշներից մեկը հայտարարում է մեր հավաքականում տիրող ըստ էության քրեական իրավիճակի մասին։
Արսեն Ջուլֆալակյանի պնդմամբ՝ հավաքականում կան անձինք, որոնք պատրաստ են թույն լցնել սննդի մեջ կամ, ասենք, ձեռք «ջարդել» իրենց համար ոչ ցանկալի մարզիկին չեզոքացնելու համար։ Եվ այդ ըմբիշները աշխարհի և Եվրոպայի առաջնություններում ներկայացնում են մեր պետությունը։ Մի՞թե հավաքականի մարզչական շտաբում տեղյակ չեն տիրող մթնոլորտի մասին։ Կարծում ենք՝ տեղյակ են։
Անցյալ տարվա օգոստոսին հրաժարական տալով հունահռոմեական ոճի հավաքականի գլխավոր մարզչի պաշտոնից՝ Լևոն Ջուլֆալակյանը՝ Արսեն Ջուլֆալակյանի հայրը, ասել էր. «Աշխատանքային 20 տարվա ընթացքում խնդիր չեմ ունեցել ո՛չ սպորտի նախարարության, ո՛չ ըմբշամարտի ֆեդերացիայի և ոչ էլ Օլիմպիական կոմիտեի հետ: Երեք ղեկավար կողմն էլ դեմ է եղել իմ որոշմանը: Հիմնական պատճառը հավաքականում վերջին ամիսներին տեղի ունեցող տարաձայնություններն են: Հավաքականի որոշ մարզիկներ ցանկանում են, որ գլխավոր մարզիչն աշխատի իրենց թելադրանքով, հավաքի ուսումնամարզական պլանն ու մրցումների մասնակիցների կազմը որոշվի իրենց ցանկությամբ»։
Սրանից հետո հնչե՞լ է արդյոք հայտարարություն, որ հավաքականում առկա տարաձայնությունները, խնդիրները հարթվել են։ Ոչ, չի հնչել։ Ավելին, այսօր հավաքականում չէ Արսեն Ջուլֆալակյանը, ինչը նշանակում է, որ խնդիրն էլ ավելի է խորացել։ Վերջին զարգացումները խոսում են այն մասին, որ ըմբշամարտի ֆեդերացիան չի տիրապետում իրավիճակին, կամ էլ այն, ինչ տեղի է ունենում հավաքականում, այսպես ասած՝ ֆեդերացիայի սրտով է։
Ստացվում է այնպես, որ հայ մարզասերը միջազգային մրցաշարերում երկրպագում է ըմբիշների, որոնք պոտենցիալ հանցագործներ են, և որոնք վերևներում «ունեն մեջք»։ Եթե մարզական գերատեսչությունները հստակ քայլեր չձեռնարկեն հավաքականում տիրող մթնոլորտն առողջացնելու ուղղությամբ, ապա մարզասերների անունից ստիպված ենք լինելու Արսեն Ջուլֆալակյանից պահանջել հրապարակել այդ 3-4 մարզիկների անունները, որոնք կարող են դիմել հանցավոր գործողությունների։
«Հաշվի առնելով այն պրոցեսները, որոնք տեղի են ունեցել, հաշվի առնելով իմ հարաբերությունները որոշ մարզիկների հետ՝ խոսքն ընդամենը 3-4 հոգու մասին է, հավաքականի հետ խնդիր չունեմ և այստեղ կոչով դիմում եմ իմ թիմակիցներին: Ասում եմ՝ նրանք լավ գիտեն, որ մենք ոչ մի խնդիր չունենք: Կոչս է՝ չմասնակցեն այդ մի քանի հոգու կազմակերպած արկածախնդրությանը, քանի որ դրանից հետո ապրելու ենք այս քաղաքում, այնպես չստացվի, որ մասնակցելով այս անարդար գործընթացներին՝ հետո փողոցում գլուխ կախեն, ամաչեն»,- ասել էր Արսեն Ջուլֆալակյանը:
Առջևում Տոկիոյի Օլիմպիական խաղերն են, որտեղ մենք մեդալների մեծ հույսեր ունենք ըմբիշներից։ Մինչև մարզական գլխավոր իրադարձությունը՝ հունահռոմեական ոճի ըմբշամարտի հավաքականում ստեղծված խնդրի լուծումն այլընտրանք չունի։ Անհրաժեշտ է նաև, որ հավաքականում տեղ ունենան այն ըմբիշները, որոնք իսկապես արժանի են ներկայացնելու մեր երկիրը։ Արսեն Ջուլֆալակյանի վերջին հայտարարությունները պետք է ազդակ հանդիսանան մարզաձևի ղեկավարների համար, և հավաքականը ձևավորվի արդար և թափանցիկ մրցակցության պայմաններում։
