Վրաստանի վարչապետ Գեորգի Գախարիան կառավարության նիստում հայտարարել է, որ կորոնավիրուսի կապակցությամբ խուճապի մատնվելու պատճառ չկա, առողջապահության նախարարությունը և համապատասխան մյուս գերատեսչությունները համակարգված կերպով վերահսկում են իրադրությունը:
Նշենք, որ երեկ Վրաստանում հաստատվեց կորոնավիրուսով վարակման առաջին դեպքը: Հիվանդը Վրաստանի 50-ամյա քաղաքացի է, որը եկել Է Իրանից: Նա Վրաստան է հասել Ադրբեջանի տարածքով: Վարչապետը նշել է, որ հունվարի 28-ին ստեղծված համակարգող խորհրդի ակտիվ աշխատանքի շնորհիվ կորոնավիրուսով վարակման առաջին դեպքը գրանցվել է սահմանին, և վարակվածը հնարավորություն չի ունեցել շփվելու Վրաստանի քաղաքացիների հետ:
«Դա առաջին դեպքն էր, որը գրանցվեց հենց սահմանին, ինչի համար ես ցանկանում եմ շնորհակալություն հայտնել առողջապահության նախարարության աշխատակիցներին, ինչպես նաև մաքսավորներին և սահմանապահ ծառայության աշխատակիցներին»,-հայտարարել է Գախարիան:
Վարակված քաղաքացու հետ շփված մաքսավորներն ուղարկվել են կարանտին: Ադրբեջանում կարանտինի մեջ են հայտնվել նաև հիվանդացածի ուղեկիցները:
