ՁԻԱՀ-ի կանխարգելման կենտրոնի և Նորք ինֆեկցիոն հիվանդանոցի միացումը վտանգելու է ամբողջ այն համակարգը, որն այսօր մեզ հնարավորություն է տվել երկրում ունենալ վերահսկելի համաճարակ։ Լրագրողների հետ զրույցում այս մասին ասաց ՁԻԱՀ-ի կանխարգելման կենտրոնի կանխարգելման բաժնի վարիչ Ժանետա Պետրոսյանը։
Նշենք, որ այս պահին ՁԻԱՀ-ի կանխարգելման կենտրոնի աշխատակիցները կառավարության շենքի մոտ բողոքի ակցիա են իրականացնում։ Նրանք պահանջում են երկու կենտրոնների միացման վերաբերյալ մասնագիտական քննարկում իրականացնել։ Վերջիններս դեմ են նաև Առողջապահության նախարարի այն որոշմանը, որով փետրվարի 25-ից աշխատանքից ազատվել է կենտրոնի տնօրեն Սամվել Գրիգորյանը, ով հունվարի 24-ից գտնվում է ժամանակավոր անաշխատունակության մեջ։
