Փետրվարի 25-ին տեղի ունեցավ ՀՀ ոստիկանության բարեփոխումների ռազմավարություն և դրանից բխող 2020-2022 թվականների գործողությունների ծրագրի հանրային քննարկումը։ Այն կազմակերպվել էր Իրավաբանների հայկական ասոցիացիայի և Հայաստանի քաղաքացիական հասարակության կազմակերպությունների հակակոռուպցիոն կոալիցիայի կողմից։
Որքանո՞վ եք այս քննարկման արդյունքները համարում գոհացուցիչ․ «Առաջին լրատվական»-ի հարցին Իրավաբանների հայկական ասոցիացիայի նախագահ, Հայաստանի ՔՀԿ-ների հակակոռուպցիոն կոալիցիայի քարտուղարության համակարգող Կարեն Զադոյանը պատասխանեց․ «Ոստիկանության բարեփոխումները կամ ոստիկանության ռազմավարության և դրանից բխող 2020-2022 թվականների գործողությունների ծրագրերն անկյունաքարային խնդիր են մեր հասարակության համար, որովհետև, երբ մենք խորհրդային համակարգից անցել ենք ժողովրդավարական համակարգին՝ ստեղծելով կամ վերականգնելով մեր անկախ պետականությունը, ավելի շատ ձևի փոփոխություն է եղել, քան բովանդակության։ Այսինքն՝ միլիցիան վերանվանվել է ոստիկանություն, բայց իր նկարագրով և գործառույթների այդ ամբողջ փնջով նա մնացել է նույն միլիցիան։ Իհարկե, անկախության տարիներին որոշակի փոփոխություններ, բարեփոխումներ եղել են, սակայն դա բովանդակային առումով բավարար չէ։ Այդ տեսակետից շատ կարևոր նախաձեռնություն էր սա, որն արդարադատության նախարարության և ոստիկանության կողմից փաստացի հանրային քննարկման են դրվել։
Այդ քննարկման ժամանակ մենք մի քանի խնդիրներ վեր հանեցինք։ Օրինակ՝ ունենք 2017 թվականին կառավարության արձանագրային որոշում, որով սահմանվում է պետական եկամուտների և ծախսերի վրա ազդեցություն ունեցող ռազմավարական փաստաթղթերի ընդունման, քննարկման մեթոդական ցուցումները։ Եվ երբ մենք համեմատում ենք ռազմավարությունն ու միջոցառումների ծրագիրը այս կառավարության փաստաթղթի հետ, որն իրենց համար ուղենիշային բնույթ պետք է ունենա, տեսնում ենք, որ այստեղ կան խնդիրներ»։
Մանրամասները՝ տեսանյութում։