Իտալիայում կորոնավիրուսի հարուցած հիվանդությունից մահացածների թիվը հասել է 11-ի, 325 մարդու մոտ վարակ է հայտնաբերվել: Ինչպես փետրվարի 26-ին գրել է Il Messaggero թերթը՝ վարակման դեպքեր են գրանցվել Իտալիայի 20 մարզերից իննում՝ տեղեկացնում է TASS-ը։
Առաջվա պես առավել մեծ թվով վարակվածներ՝ 240 հոգի, ապրում են հյուսիսային Լոմբարդիայում, որն անցած շաբաթվա վերջին կորոնավիրուսի բռնկման տեղային կենտրոն է դարձել: Փետրվարի 25-ին վարակման ևս երեք դեպք գրանցվել է արդեն Սիցիլիայում, Պալերմոյում, վարակվել են Իտալիայի հյուսիսից ժամանած զբոսաշրջիկները: Այդ պատճառով կղզային տարածաշրջանի վարչական կենտրոնի քաղաքապետարանը որոշում է ընդունել երեք օրով դպրոցները փակել վարակազերծման համար:
Իշխանությունները նաև սպասում են հիվանդության առաջին դեպքի հաստատմանը Մարկեի մարզում, մինչդեռ տեղի իշխանություններն արդեն կարգադրել են դպրոցները փակել մինչև մարտի 4-ը և չեղարկել բոլոր հանրային միջոցառումները: