Հայտնի է դարձել Յապոնչիկ մականունով հայտնի «օրենքով գող» Վյաչեսլավ Իվանկովի սպանության մասնակիցներից երկրորդի անունը։ Այս մասին փետրվարի 25-ին Lenta.ru լրատվական կայքին հայտնել է Ռուսաստանի քննչական կոմիտեի պաշտոնական ներկայացուցիչ Սվետլանա Պետրենկոն։
«Դա նախկինում բազմիցս դատապարտված 39-ամյա Կախա Գազաևն է, որը դատարանի վճռի հիման վրա 2017-ից գտնվում է ազատազրկման վայրում՝ այլ հանցանքների կատարման համար»,- պատմել է Պետրենկոն։
Հետաքննության տվյալներով՝ Գազաևը հանցագործության մասնակիցներին ինքնաձիգ է տրամադրել, որից սպանվել է Յապոնչիկը։ Սպանության պահին Գազաևը գտնվել է հանցանքի վայրում և հետևել է դրան հարակից տարածքին։ Բացի այդ, նա անձամբ է մասնակցել ինքնաձիգի տեղափոխմանն ու թաքցնելուն։
Նրան մեղադրանք է ներկայացվել սպանության և ապօրինի զենք պահելու համար։ Դատարանը բավարարել է հետաքննության միջնորդությունը և երկու ամսով ձերբակալել է Գազաևին։
Փետրվարի 6-ին Մոսկվայում Բասմանյան դատարանը ՔԿՀ էր ուղարկել Յապոնչիկի սպանության մասնակիցներից մեկին, քրեական հեղինակություն Մուրտազ Շադանիային։
2009թ․ հուլիսի 28-ի երեկոյան Իվանկովը դուրս էր եկել ռեստորանից և սպանվել անհայտ անձի կողմից։ Գնդակը դիպել էր փորին։ Յապոնչիկին հոսպիտալացրել էին և վիրահատել, սակայն նա չկարողացավ դուրս գալ այդ վիճակից և մահացավ նույն տարվա հոկտեմբերի 9-ին, մոսկովյան կլինիկայում։
