Լուրեր
Դատերի միջև նմանություններ կան. երկուսն էլ մարմնավորում են բռնազավթված պետությունը

Այսօր՝ փետրվարի 25-ին, Հայաստանում ուշագրավ իրադարձություն է տեղի ունեցել՝ մեկնարկել է երրորդ նախագահ Սերժ Սարգսյանի դատավարությունը ու նաև նշանակված էր երկրորդ նախագահ Ռոբերտ Քոչարյանի դատաքննության հերթական նիստը։ Հայաստանի հասարակությունը հեղափոխությունից հետո արդեն վարժվել է այն իրողությանը, որ պատասխանատվության կարող է կանչվել անգամ նախկին նախագահը, ու նրան չի կարող փրկել ոչ մի անձեռնմխելիություն։ Հիմա, ըստ էության, նոր իրավիճակ է ստեղծվում, որովհետև ամբաստանյալի կարգավիճակում է հայտնվում մեկ այլ նախագահ։ Հարկ է նկատել, որ Հայաստանն ամենևին էլ միակ երկիրը չէ, որտեղ նախագահներ են դատում, ընդ որում՝ կան երկրներ, որտեղ ամբաստանյալի կարգավիճակ են ունեցել մի քանի նախագահներ։ Այնուամենայնիվ, ինչ առանձնահատկություններ ունեն հայկական դատավարությունները:

Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Ռուբեն Մեհրաբյանը, վերլուծաբան Հակոբ Բադալյանը և «Անտարես» հրատարակչության տնօրեն Արմեն Մարտիրոսյանը:

Հակոբ Բադալյանի գնահատմամբ՝ Սերժ Սարգսյանի դատավարությունը խորհրդանշական առանձնահատկություն ունի. «Պետության պատճառած կես միլիարդի վնասի մասին է խոսքը, այսինքն՝ մեծ ֆինանսական ծավալների մասին չէ, բայց խորհրդանշում է համակարգի կոռուպցիոն գանձագողության բնույթը»: Վերլուծաբանի կարծիքով՝ տողատակում կա նաև քաղաքական խնդիր՝ պետք է լինի փաստացի վճիռ, թե ի վերջո ով է վերականգնելու պետությանը հասցված վնասը և ինչ հարաբերակցությամբ է բաշխվելու վերադարձնողների միջև»:

Ռուբեն Մեհրաբյանի խոսքով՝ կա նմանություն այն առումով, որ երկու նախագահներն էլ մարմնավորում են պետության բռնազավթումը: «Բայց գործ ունենք տարբեր բնույթի հանցագործություններում մեղադրանքների հետ…»: Քաղաքագետի կարծիքով՝ կարևոր է նաև համատեքստը. «Համատեքստն այստեղ այն է, որ Հայաստանը թևակոխում է հանրաքվեի քարոզարշավի ակտիվ փուլ, հանրաքվե, որն ուղղված է համակարգը աղբից մաքրելուն, խոչընդոտները վերացնելուն և բարեփոխումներ անելուն»:

Արմեն Մարտիրոսյանի դիտարկմամբ՝ երկու նախագահների մեղադրանքների տարբերություններն ահռելի մեծ են. «Մի դեպքում տեսնում ենք «արքայասպանություն»՝ սահմանադրասպանություն, մյուս դեպքում գործ ունենք ջեբկիրության հետ, երբ պետության գրպանից գումարներ են տարել… Որպես Մարտի 1 տեսած մարդ՝ կարող եմ ասել, որ Քոչարյանի արարքի թողած հետքն էապես ավելի խորն է. կան սպանվածներ, հաշմանդամներ, ազատությունը կորցրածներ և այլն»:

«Ռոբերտ Քոչարյանի համար անընդունելի է ոչ միայն մեղադրանքն ինքնին, այլ նաև այն, որ միայն իրեն է մեղադրանք առաջադրվում»,- նշեց Հ. Բադալյանը՝ անդրադառնալով դիտարկմանը, որ Ռ. Քոչարյանն այսօր դատական նիստի ժամանակ հայտարարել է, թե ոստիկանությունը նախագահին չի ենթարկվել, այլ վարչապետին: Վերլուծաբանի դիտարկմամբ՝ Քոչարյանը այդ հանգամանքն նշում է Սերժ Սարգսյանի պատասխանատվությունն ընդգծելու համար:

Արմեն Մարտիրոսյանը հավելեց, որ Ռոբերտ Քոչարյանը փուռը տալու ակնարկները սկսել է հենց առաջին օրվանից, և գնալով՝ դա ուժգնացել է:

Մանրամասն՝ տեսանյութում:

  • Դիտումներ՝ *