Չեչնիայի Շելկովսկի շրջանում երկու կանայք են ձերբակալվել կախարդությամբ զբաղվելու համար, նրանք խոստովանել են, որ իրենք «մեծ մեղք» են գործել: Այս մասին հայտնի է դարձել YouTube- ում հրապարակված տեսանյութից՝ գրում է lenta.ru-ն:
Ըստ հեռուստաալիքի՝ Տաուս Շապիանովան ամուսնու հետ միասին հմայություն է արել ամուլետներով, կանխատեսել է ապագան և հաջողություն ձգել: Նրա հանցակիցը՝ Զուլայ Աբուբաքարովան, հաճախորդներ է հայթայթել և վճարված գումարներից տոկոս ստացել։
«Իսլամական բժշկության կենտրոնի» գլխավոր բժիշկ Ադամ Էլժուրկաևը բացատրել է, որ իրենց զբաղմունքով կանայք «վնասում են ոչ միայն իրենց, այլև նրանց, ովքեր դիմում են իրենց»: Նա նաև երկու կանանց որդիներին կոչ է արել «ուշադիր հետևել, թե ինչ է կատարվում իրենց ընտանիքներում»: Կանայք խոստովանել են, որ մոլորության մեջ են գցել մարդկանց՝ «մեծ մեղք» գործելով:
