Լուրեր
Մի բանի մասին եմ մտածում՝ տաք-տաք գլուխները չփորձեն խառնել մեր ընտրությունները. Արցախի թեմի առաջնորդ
  • 21:20
  • 2020-02-25
  • Դիտումներ՝ *

«Առաջին լրատվական»-ը շարունակում է իր աշխատանքը Արցախի մայրաքաղաք Ստեփանակերտից: Մեր զրուցակիցն է Արցախի հոգևոր առաջնորդ Պարգև սրբազանը:

«Մենք` հայերս, ունենք երկու նպատակ՝ ճանաչեցնել տալ Արցախի Հանրապետությունը և Ցեղասպանության ճանաչումը, նաև, իհարկե, ապահովել մեր միացյալ հայրենիքի անվտանգությունը: Մենք բռնել ենք այս ճանապարհը ու չպիտի շեղվենք և ուժ չպիտի խնայենք՝ նպատակ ես դրել, պիտի հասնես: Ես կարծում եմ՝ ամբողջ հայությամբ պիտի լծված լինենք այդ առաքելությանը»,- նշեց Արցախի թեմի առաջնորդը:

Անդրադառնալով Արցախում կայանալիք համապետական ընտրություններին՝ նա  ասաց, որ վերջին 30 տարիներին, բարեբախտաբար, բավական լավ են անցել ընտրությունները. «Առանց լցոնումների, առանց ընտրակաշառքի, առանց կեղծիքների: Բայց ես կարծում եմ, որ այս ընտրությունը պետք է դառնա ավելի լավը, պետք է ձգտենք ավելի իդեալականին. որպեսզի Արցախի Հանրապետությունը ճանաչվի աշխարհով մեկ, պետք է ապացուցենք, որ ժողովրդավար երկիր ենք: Այս տարածաշրջանում մենք պետք է ամենա-ամենաօրինակելի ընտրությունն անցկացնենք»:

Ինչ վերաբերում է եկեղեցու դերակատարությանը, Պարգև սրբազանը հիշեցրեց այն չգրված օրենքը, ըստ որի՝ եկեղեցին չի մխրճվում քաղաքական գործընթացների մեջ. «Սակայն երբ լինում են սրացումներ, լարումներ, հանդարտություն բերելու համար ստիպված ենք լինում երբեմն-երբեմն՝ անտեսանելի, երբեմն էլ տեսանելի ձևով միջամտել և մեր հոգևոր զավակներին հորդորել, որ ի վերջո՝ մեկ ընտանիք ենք, ընտրությունը պետք է հարթ անցնի, ընտրությունից հետո բոլորս ուս ուսի տված պետք է ծառայենք»:

Արցախի հոգևոր առաջնորդը նաև վստահություն հայտնեց, որ Հայաստանի Հանրապետության և Արցախի Հանրապետության միջև միշտ լինելու են ամենահարազատ և սերտ կապերը. «Ոչ մի բան չի կարող մեզ խոչընդոտել՝ անկախ անձանցից ու ղեկավարներից: Գաղտնիք չէ՝ ուշ թե շուտ մենք միանալու ենք մայր Հայաստանին»:

 

Հարցազրույցն ամբողջությամբ՝ տեսանյութում:

  • Դիտումներ՝ *