ԱԺ պետական-իրավական հարցերի մշտական հանձնաժողովը այսօր՝ փետրվարի 25-ին, հրավիրել է խորհրդարանական լսումներ՝ «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին»:
Պատգամավոր Արման Բաբաջանյանը հայտարարեց, որ մինչ քննարկումը պետք է նախ ախտորոշել, թե ինչով է հիվանդ դատական համակարգը:
«Հայաստանում ավելի քան 2 տասնամյակ պետությունն ու իշխանությունը գտնվել են զավթված վիճակում: Դա ծանրագույն հանցագործություն է, որը կատարվել է համակարգված կերպով, որին մասնակցել են ամենաստորին պաշտոնյաներից մինչև ամենաբարձրաստիճան պաշտոնյաները՝ ապահովելով օրվա իշխանության վերարտադրությունը: Այսինքն՝ մենք ունենք իրավիճակ, որում պետական կառավարման համակարգի, դատական իշխանության, ուժային կառույցների ներկայացուցիչների զգալի մասը ուղղակի կամ անուղղակի կերպով ներքաշված է եղել այդ հանցավոր շղթայի մեջ: Պետության զավթումը տեղի է ունեցել հատկապես դատական համակարգի, դատարանների, ՍԴ-ի առաջնային դերակատարությամբ ու հանցակցությամբ»,- նշեց նա:
Պատգամավորի խոսքով՝ դատական իշխանության մաքրումը հեղափոխությունից հետո անկյունաքարային նշանակության իրողություն է. «Հեղափոխությունը կարող է պարտվել, եթե Հայաստանը չկարողանա դատաիրավական այնպիսի բարեփոխումներ իրականացնել, որոնք կսինխրոնանան երկրում տեղի ունեցող քաղաքական իրողությունների հետ: Այսօր մենք ունենք իրավապահ և դատական այնպիսի մարմիններ, որոնք նախկինում թաթախված են եղել հանցավոր սխեմաների մեջ»:
Արման Բաբաջանյանն ընդգծեց՝ Մարտի 1-ը և դրան նախորդած ու հաջորդած այլ քաղաքական բռնաճնշումներ այնքան ողբերգական չէին լինի, եթե օրվա իշխանությունն իր գրպանում չունենար դատական այնպիսի իշխանություն, որը կհամաձայներ գիշերներով դատական նիստեր անցկացնել և մարդկանց մասսայաբար կալանավորելու որոշումներ արձակել՝ մարդկանց տարիներով պահելով անազատության մեջ:
«Մենք պետք է միասին գտնենք այն ալգորիթմները, որոնք հնարավորություն կտան առանց ցնցումների հաղթահարել արդի ճգնաժամերը: Դատական իշխանության բարեվարքության խստագույն կանոններ, վեթինգ, լյուստրացիոն մեխանիզմներ. ահա գործիքների թերևս ամբողջական ցանկը, որոնք պետք է կիրառել համաժամանակյա կերպով»,- նշեց նա:
Մանրամասները՝ տեսանյութում: