Ոստիկանության սպասվող բարեփոխումները լինելու են սահուն՝ առանց ցնցումների ու կադրային ջարդի: Նախօրեին ոստիկանության բարեփոխումների ռազմավարության քննարկման ժամանակ ասել էր ՀՀ փոխոստիկանապետ Տիգրան Եսայանը: «Բարեփոխումները շատ սահուն են լինելու:
Միանշանակ կարող եմ ասել, որ կադրային ջարդ չի լինելու ոստիկանությունում: Բոլոր նրանք, ովքեր իրենց մասնագիտական հմտություններով կհամապատասխանեն նոր ներկայացվող պահանջներին, կմնան ու կաշխատեն ՝ անկախ նրանց ով լինելուց»,- ասել է Եսայանը: Նա նաև նշել էր, որ նոր ծառայությունների ստեղծման ճանապարհին, ովքեր դուրս կմնան ծառայությունից, կտեղափոխվեն ոստիկանության տարբեր այլ ծառայություններ:
Իրավապաշտպան Մարինա Պողոսյանի խոսքերով՝ որքան էլ բարեփոխումների շրջանակներում շեշտը դրվի կրթականի վրա, անհնար է պատկերացնել հին ու գործող կադրերով բարեփոխում ասվածը: Բարեփոխումը, ըստ մեր զրուցակցի, նշանակում է նորություն, թարմություն, փոփոխություն, իսկ հինով թարմություն ապահովել հնարավոր չէ։ «Մենք 30 տարի է՝ տեսնում ենք նույն մարդկանց, նույն մարդկանց տղաներին ու փեսաներին համակարգում: Ոչ մի փոփոխություն էլ չկա: Վովա Գասպարյանն էլ էր չբարեփոխված ոստիկանին հանում համազգեստի միջից: Տեսանք, թե դա ինչ արդյունք տվեց: Զրո արդյունք: Ոչ ոք էլ համազգեստի միջից չհանվեց: Ինչ է նշանակում՝ նորաստեղծ ծառայությանը չհամապատասխանողներին տանել ուրիշ ծառայություն: Տանել, որ մյուս ծառայությունն էլ ապականի՞: Սա ինչ մոտեցում է»,-«Առաջին լրատվական»-ի հետ զրույցում ասաց Պողոսյանը: Նրա խոսքերով՝ իր պատկերացմամբ, ոստիկանության բարեփոխումները պետք է ավելի ռադիկալ լինեն։ «Այդ ռադիկալ մոտեցման արդյունքում ոստիկանները պետք է փոխվեն, եղածներն էլ՝ կրթվեն: Հիմա ոստիկանը չի փոխվել: ՀՀ քաղաքացին իրեն պաշտպանված չի զգում ՀՀ ոստիկանի կողմից: Նրանք սովոր են մեկ անձի հրահանգ կատարելու, ուրիշ բանի ունակ չեն ներկա ոստիկանները: Ոստիկանը, որը ծառայել է Սերժ Սարգսյանին, չի կարող ծառայել հանուն Հայաստանի Հանրապետության: Խոշտանգման, բռնության, կեղծիքի, պատվեր կատարելու սովոր, սրան-նրան կրիշ կանգնող ոստիկանը չի կարող նոր Հայաստանի ոստիկան լինել: Եվ սա գալիս է նրանից, որ ժամանակին պատշաճ գնահատական չտրվեց կատարվածին ու, ավելին, մարդու իրավունքները շարունակաբար ոտնահարողներին տարանք պաշտոններ տվեցինք, Հունան Պողոսյանին մարզպետ տվեցինք: Այ, այդտեղից է գալիս սխալը: Ու եթե ոստիկանական բարեփոխումներն էլ են թավշապատ լինելու, ապա այս գլխից կարող եմ ասել, որ գործընթացը ձախողված է լինելու, ոչ մի արդյունք էլ չեն ունենա: Ուղղակի հերթական անգամ միլիոնավոր դոլարներ կծախսվեն այդ բարեփոխումների վրա»,- ասաց տիկին Պողոսյանը:
Իրավապաշտպան Ժաննա Ալեքսանյանը ևս չի պատկերացնում, թե ինչպես է հնարավոր հին գինին լցնել նոր տիկերի մեջ: «Առանց կադրային փոփոխությունների, ես չեմ պատկերացնում այդ բարեփոխումը: Չնայած, եթե բարեփոխելու կամքը շատ մեծ է, գուցեև ստացվի: Բայց մենք գիտենք մեր ոստիկանությանը, գիտենք, որ նախկինում ոստիկանությունը մշտապես մեկ անձի հրահանգով է աշխատել, ուղղորդվել: Մենք տեսել ենք, թե այդ ոստիկանությունը ինչպես է հանրային բողոքի ակցիաների ժամանակ վարվել, ինչ մոլուցքով էր այդ մեկ անձի հրամանով մարդկանց ծեծում, ջարդում: Հիմա, եթե կադրային փոփոխություն չի լինելու, պետք է տեսնել, թե ինչպես է իրեն դրսևորելու ոստիկանապետը, արդյոք էլի՞ մեկ անձի ցուցումով է ամեն ինչ կատարվելու, թե՞ մարդիկ իրենց տեղում են լինելու: Եթե էլի մեկ անձի ցուցումներով վիճակը պահպանվեց, ապա, չեմ կարծում, որ այդ ոստիկանությունը պետք է համարել բարեփոխված»,-ասաց տիկին Ալեքսանյանը՝ հավելելով, որ ամեն դեպքում պետք է արձանագրել, որ հեղափոխությունից հետո իրավիճակ է փոխվել, և այս իրավիճակում ոստիկանությունը չի կարող աշխատել այնպես, ինչպես առաջ էր աշխատում: Նախկին գործելակերպը, ըստ իրավապաշտպանի, մեծ ընդվզում կառաջացնի:
Այս ամենից բացի՝ Ժաննա Ալեքսանյանի խոսքերով՝ ոստիկանության բարեփոխումների առաջին ցուցիչը պետք է լինի այն, որ նախկինում բոլոր ապօրինություններ թույլ տվածների հարցը բարձրացվի, և նրանք պատասխանատվության ենթարկվեն. «Մենք ունենք Սարի թաղի դեպքերը, «Էլեկտրիկ Երևան»-ի դեպքերը, մենք ունենք բռնության ենթարկված Էդգար Ծատինյանի գործը: Ու եթե այս գործերը չվերհանվեն ու պատշաճ գնահատականի չարժանանան, ապա ոչ մի բարեփոխում էլ չի կարող լինել: Սրանք բարեփոխումների առաջին ցուցիչները կլինեն»: