Երևանում այսօր մեկնարկում է Սերժ Սարգսյանի գործով դատավարությունը: Ինչպես հայտնի է, գործն առնչվում է պետական սուբսիդավորմամբ դիզվառելիքի ծրագրին, որն իրագործվել է 2013 թվականին: Ըստ պաշտոնական մեղադրանքի, որ ներկայացված է Սերժ Սարգսյանին, այդ ժամանակաշրջանում գյուղնախարարի պաշտոնը զբաղեցրած Սերգո Կարապետյանին՝ որի ցուցմունքի հիման վրա է ներկայացված մեղադրանքը Սերժ Սարգսյանին, նաև մեղադրանք է առաջադրված Բարսեղ Բեգլարյանին՝ Սերժ Սարգսյանի մտերիմ գործարար, որի ներկրված թանկ վառելիքն էլ, ըստ գործի, գնվել է ավելի էժան առաջարկի փոխարեն: Այդ ամենի հետևանքով, ըստ մեղադրանքի, պետությանը պատճառվել է շուրջ կես միլիարդ դրամի վնաս:
Դատավարությունը, որ մեկնարկում է այսօր, հերթականն է հեղափոխությունից հետո աղմկոտ գործերի առնչությամբ, և երկրորդը, որում մեղադրանք է ներկայացված նախկին ամենաբարձրաստիճան պաշտոնյայի: Իհարկե, երկու գործերն իրենց ծանրությամբ ուղղակի համեմատելի չեն, բայց մարտիմեկյան գործով սահմանադրական կարգը տապալելու մեղադրանք է ներկայացված Ռոբերտ Քոչարյանին, իսկ դիզվառելիքի գործով՝ պետությանը վնաս պատճառելու մեղադրանք է ներկայացված Սերժ Սարգսյանին: Ռոբերտ Քոչարյանը անազատության մեջ է, Սերժ Սարգսյանն՝ ազատության, երկիրը չլքելու խափանման միջոցով: Արդեն իսկ Սարգսյանի համակիրների և կուսակիցների գրառումից պարզ է դառնում, որ դատավարությունը կուղեկցվի համակիրների հավաքով, որոնք աջակցություն կհայտնեն Սերժ Սարգսյանին: Ինչպես հայտնի է, նրա հանդեպ մեղադրանքը յուրայիններն արդեն իսկ գնահատել են քաղաքական հետապնդում:
Մեկնարկող դատավարությունը, սակայն, այդ իմաստով կարող է վերածվել Սերժ Սարգսյանի և Ռոբերտ Քոչարյանի միջև երկարամյա, այդ թվում՝ հեղափոխությունից հետո էլ շարունակվող մրցության կամ դիմակայության որոշակի դրսևորման: Խոսքը համակիրների բազմության մասին է, թե ում համախոհներն են դատարանի դիմաց առավել մեծաթիվ ու, թերևս, նաև առավել «գաղափարական»: Որովհետև ակնառու է նաև, որ Ռոբերտ Քոչարյանը հանրային աջակցությունը դիտարկել է ոչ միայն որպես մեղադրանքից պաշտպանության մարտավարական կարևոր բաղադրիչ, այլ նաև որպես ներհամակարգային մրցակցության տարր՝ ցույց տալու համար, որ ունի հանրային աջակցություն՝ ի տարբերություն մերժված Սերժ Սարգսյանի, և 2018-ի ապրիլյան մերժումը չի տարածվում իր վրա: Երկրորդ նախագահը մեկ անգամ չէ, որ ակնարկել է կասկածները Սերժ Սարգսյանի նկատմամբ, և այդ իմաստով, Սարգսյանի ուղղությունը նրա համար ոչ բացահայտ, սակայն պայքարի առանցքային ուղղություն է: Ի դեպ հետաքրքիր է, որ Սարգսյանի դատավարության մեկնարկին զուգահեռ, հայտնի դարձավ նաև Ռոբերտ Քոչարյանի ազատության երաշխավորագիր ներկայացնելու նոր նախաձեռնության մասին: Այս անգամ ոչ թե Արցախի գործող և նախկին նախագահների, այլ Հայաստանի և Արցախի նախկին վարչապետների՝ Խոսրով Հարությունյան, Կարեն Կարապետյան, Վազգեն Մանուկյան և Անուշավան Դանիելյան:
