Իրավիճակը որոշակիորեն թեժացել է հայ-ադրբեջանական սահմանի մի հատվածում՝ Տավուշի ուղղությամբ՝ Կոթի գյուղի դիրքերում: Այսօր՝ փետրվարի 24-ին, ադրբեջանցիները կրակ են բացել դիրքերի վրա, ինչին հետևել է հայկական ուժերի պատասխանը: Ադրբեջանը հայտնել է մեկ զինծառայողի կորստի մասին, որն իբրև թե զոհվել է հայկական կրակոցից: Հայաստանի պաշտպանության նախարարի մամուլի քարտուղար Արծրուն Հովհաննիսյանը հայտնել է, որ ադրբեջանցիները լռել են հայկական կողմի պատասխան կրակոցից հետո: ՀՀ ՊՆ խոսնակը հայտնել է նաև մեր կողմից վիրավորված զինվորի մասին և հայտնել, որ նրա կյանքին վտանգ չի սպառնում:
Թեմայի շուրջ «Առաջին լրատվական»-ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, ԱԺ «Իմ քայլը» խմբակցության պատգամավոր Վաղարշակ Հակոբյանը և վերլուծաբան Դավիթ Հովհաննիսյանը:
Ազատ Արշակյանի կարծիքով՝ Ադրբեջանի կողմից այս սադրանքը ունի երկու նպատակ՝ մեզ ընկճելու և ադրբեջանցիներին ոգևորելու և ցույց տալու, որ «պերեստրոյկա» է գնում: «Մեր օրակարգ պետք է մտնի դիպուկահարներին դիրքերից հեռացնելը և անհասանելի դարձնելը»,- ընդգծեց Ազատ Արշակյանը:
Վաղարշակ Հակոբյանը նույնպես կարծիք հայտնեց, որ այս սադրանքով Ադրբեջանը փորձում է ներքին լսարանի համար օրակարգ ձևավորել և երկրորդ՝ այս դժբախտ պատահարներից դիվիդենտներ քաղել: Պատգամավորի խոսքով՝ Ադրբեջանն ամեն ինչ անում է, որ որոշակի սրումների արդյունքում ձևավորի իրենց ցանկալի օրակարգ:
Ինչո՞ւ է Ադրբեջանը Տավուշի ուղղությամբ գնացել իրադրության թեժացման, կրակոցների: Դա տեղի է ունենում մյունխենյան հայտնի քննարկումից և Ստեփանակերտում վերջերս տեղի ունեցած Հայաստանի և Արցախի անվտանգության խորհուրդների համատեղ նիստից հետո: Դավիթ Հովհաննիսյանի դիտարկմամբ՝ մյունխենյան հանդիպումը ցույց տվեց, որ կողմերը խաղաղ կարգավորման կետից բավականին մեծ հեռավորության վրա են գնտվում, և ֆիքսվեց, որ շուտափույթ լուծումների ու փոխզիջումների մասին խոսակցությունները չեն համապատասխանում իրականությանը: «Կողմերը գտնվում են սկզբունքային հակադիր դիրքերի վրա, և իրողության այս թեժացումը կարող է նաև դրանով պայմանավորված լինել»,- ընդգծեց վերլուծաբանը՝ հավելելով, որ Ադրբեջանը ուզում է ցույց տալ, որ ուժային լուծումը բացառված չէ:
Մանրամասն՝ տեսանյութում: