Երևանում կառուցված դղյակներն ապօրինի են. օրերս այս մասին բարձրաձայնեց նաև ՀՀ վարչապետ Նիկոլ Փաշինյանը: Այդ դղյակները մշտապես եղել են հանրության ուշադրության կենտրոնում: Այս և այլ թեմաների շուրջ «Առաջին լրատվական»-ը զրուցեց լրագրող, հրապարակախոս Տիգրան Պասկևիչյանի հետ:
Արդյո՞ք ակնհայտ չէ, որ ի սկզբանե գործել է կոռուպցիոն մեխանիզմ՝ մարդիկ կառուցել են դղյակներ, հետո նոր որոշել են օրինականացնել դրանք: «Ինչքան հիշում եմ, այդ դղյակների մասին անընդհատ գրում են,- նշեց Տ. Պասկևիչյանը,- այդ թեման անընդհատ շրջանառվել է, և այդ մասին այսօր պետք է ոչ թ հայտարարել, այլ ինչ-որ տարբերակ գտնել այդ հարցերը վերաքննարկելու: Բնականաբար եթե կառուցված է մի դպրոցի չափ բնակելի տուն, անպայմանորեն բնակելի մեխանիզմների հետ է կապված… Անիմաստ մեծության տուն կառուցողների վրա պետք է դրվի անիմաստ մեծության հարկ: Պետք է պարզել՝ ինչ կոռուպցիոն գործարքներ են իրականացվել»:
Դիտարկմանը, որ արդարանում են, օրինակ, ասելով՝ մոսկվացի քեռիս է նվիրել, Տ. Պասկևիչյանը նշեց. «Պետությունը պետք է մտածի՝ ինչպես պետք է լուծի «կրուտիտների» հարցը: Այդ մարդիկ, թող պետությունից գողացված ամբողջ գումարները վերադարձնեն ու ինչքան ուզում են, ապրեն այդ ամրոցներում: Բայց կա մյուս տարբերակը՝ երբ որ հստակեցվի, որ իսկապես գողություն է տեղի ունեցել, պետությունը կարող է ազգայնացնել այդ շինությունը և մաս մաս վաճառել կամ հատկացնել ինչ-որ մարդկանց՝ ասենք՝ արվեստագետներին… Մտահոգություն ունեմ՝ սա չլինի միայն հռչակված խոսք և անհետանա աղմուկի մեջ: Ուզում եմ, որ իշանությունը հետևողական լինի բոլոր հարցերում»:
«Տպավորություն ունեմ, որ իշխանությունը չունի կուրս, որի մեջ բոլոր խնդիրները հերթականությամբ կամ զուգահեռ կդասավորվեն և կսկսվեն լուծվել…,- ընդգծեց մեր զրուցակիցը:- Հիասթափված եմ՝ հեղափոխությունը ցանցային իր բնույթից նորից դարձավ բրգաձև»
Մանրամասն՝ տեսանյութում:
