Իտալիայի Ա սերիայի 25-րդ տուրում «Ռոման» տպավորիչ խաղով 4 անպատասխան գնդակ ուղարկեց «Լեչեի» դարպասը։ Վստահաբար կարող ենք ասել, որ հանդիպման լավագույն ֆուտբոլիստը Հայաստանի ազգային հավաքականի ավագ Հենրիխ Մխիթարայնն էր։ Մեր ֆուտբոլիստի անմիջական ջանքերով «Ռոման» առաջին կեսում երկու գնդակի առավելություն ստացավ՝ բեկելով հանդիպման ընթացքը։ 13-րդ րոպեին Մխիթարյանը մրցակցից խլելով գնդակը՝ այն փոխանցեց Ջենգիզ Ունդերին, որը բացեց հաշիվը: Արդեն 37-րդ րոպեին գոլի հեղինակ դարձավ ինքը՝ Մխիթարյանը, Էդին Ջեկոյի փոխանցումից հետո։
Երեկ համոզվեցինք, որ մեր հավաքականի ավագը խաղից խաղ բարելավում է մարզավիճակը։ Փետրվարի 9-ին Ա սերիայի 23-րդ տուրում «Բոլոնիայի» դեմ մրցավեճում դառնալով գոլի հեղինակ՝ Հենրիխ Մխիթարյանը ապացուցել է, որ շարունակում է լինել իր թիմի առանցքային խաղացողներից մեկը։ Նշենք, որ «Լեչեի» դարպասը խփած գնդակը Մխիթարյանի 5-րդ գոլն էր իտալական թիմի կազմում։
Վնասվածքների պատճառով ընթացիկ մրցաշրջանում Մխիթարյանը մասնակցել է ընդամենը 12 հանդիպման։ Անցյալ տարվա սեպտեմբերի վերջին Մխիթարյանը աճուկի լուրջ վնասվածք ստացավ, որի ապաքինման համար պահանջվեց 2 ամսից ավելի։ Շարք վերադառնալով՝ նա գոլի հեղինակ դարձավ Ա սերիայի 14-րդ տուրի «Վերոնայի» դեմ մրցավեճում՝ կրկին ապացուցելով, որ մեծ պրոֆեսիոնալ է։ Հայ ֆուտբոլիստը աչքի ընկավ նաև 16-րդ տուրի «Սպալի» հետ խաղում, և թվում էր, թե Հայաստանի ազգային հավաքականի ավագը մրցաշրջանի միջնամասում երկրորդ շունչն է հավաքում, բայց… Հունվարի սկզբին «Տորինոյի» դեմ խաղում նա կրկին վնասվածք ստացավ և բաց թողեց «Ռոմայի» համար խիստ կարևոր «Յուվենտուսի» դեմ առաջնության և գավաթային հանդիպումները, ինչպես նաև հռոմեական դերբին։ «Ռոմայի» գլխավոր մարզիչ Պաուլու Ֆոնսեկան հույս էր հայտնել, որ Մխիթարյանը կկարողանա մասնակցել հռոմեական դերբիին, բայց հայ ֆուտբոլիստն այդ հանդիպմանը հայտավորված չէր։ Շարք վերադառնալուն պես՝ հենց առաջին մրցավեճում, Մխիթարյանը կրկին գոլ խփեց՝ գրավելով «Բոլոնիայի» դարպասը։
Սա անհավանական ցուցանիշ կարելի է համարել մի քանի տեսանկյուններից։ Տևական ժամանակ չխաղալով՝ ֆուտբոլիստները մարզավիճակի և ֆունկցիոնալ պատրաստվածության հետ կապված խնդիրներ են ունենում։ Սովորաբար զգացնել է տալիս նաև խաղային պրակտիկայի պակասը։ Մարզիչները վնասվածքից ապաքինված ֆուտբոլիստներին սովորաբար փոխարինման են դուրս բերում։ Մխիթարյանը «Բոլոնիայի» դեմ խաղաց հանդիպման առաջին րոպեից, խաղաց ենթահարձակվողի դիրքում, որտեղ նրան հաճախ չենք տեսնում։ Ավելին, ցույց տալով, որ ֆիզպատրաստության հետ կապված որևէ խնդիր չունի, մեր ֆուտբոլիստը խաղավարտից 18 րոպե առաջ գոլի հեղինակ դարձավ։
Երեկվա խաղում Մխիթարյանը շատ ավելի թարմ տեսք ուներ և զարգացնում էր բարձր արագություն։ Սա խոսում է նաև այն այն մասին, որ Մխիթարյանը շարունակում է մեծ մոտիվացիայով խաղալ։ Կցանկանա՞ արդյոք «Ռոման» մրցաշրջանի ավարտին պայմանագիր կնքել հայ ֆուտբոլիստի հետ։ Երեք ամսից կվերջանա հայ ֆուտբոլիստի վարձակալության ժամկետը։ «Հիմա պետք է մտածել միայն առաջիկա երեք ամիսների մասին: Վաղ է խոսել իմ ապագայից: Կարող եմ ասել, որ ինձ դուր են գալիս այս թիմը, քաղաքը և երկրպագուները»,- Մխիթարյանի խոսքերը փոխանցում է «Coriere dello Sport»-ը: Այս հայտարարությունը խոսում է այն մասին, որ Մխիթարյանը ունի ցանկություն պայմանագիր կնքելու «Ռոմայի» հետ։
Ինչ խոսք, նախընտրելի կլինի, որ Մխիթարյանը շարունակի ելույթները «Ռոմայում» և վերջնականապես հաղթահարի մարտահրավերը։ Այս պահին նրա վերադարձը «Արսենալ» քիչ հավանական է թվում։ Վերջին շրջանում շատ էր խոսվում այն մասին, որ «Ռոման» ևս մեկ առաջարկով կդիմի «Արսենալին»՝ Հենրիխ Մխիթարյանի տրանսֆերը գնելու համար: Անգլիական ԶԼՄ-ները գրում են, որ «Ռոմայի» նախկին՝ 10 միլիոն եվրո առաջարկն «Արսենալի» համար անընդունելի է եղել, և այժմ իտալական ակումբը հայ կիսապաշտպանի համար առաջարկում է 14 միլիոն եվրո:
«Ռոմա»-«Բոլոնիա» հանդիպումից հետո Հայաստանի ազգային հավաքականի ավագի խաղին անդրադարձել էր «La Gazzetta Sportiva-ն. «4 գոլ՝ 10 խաղում: Այն, որ Մխիթարյանը մեծ տաղանդի տեր ֆուտբոլիստ է, կասկածից վեր է: Այս առումով հայ ֆուտբոլիստը նման է իր փորձառու թիմակցին՝ Խավիեր Պաստորեին: Երկուսն էլ մեծ տաղանդի տեր ֆուտբոլիստներ են: Ի տարբերություն Մխիթարյանի, սակայն, Պաստորեն կարող է հանգիստ լինել, քանզի պայմանագիր ունի «Ռոմայի» հետ մինչև 2023 թվականը, իսկ Մխիթարյանը ապացուցելու շատ բան ունի. ոչ միայն գոլեր են պետք, այլև ավելին: Մխիթարյանը պետք է ֆիզիկապես ավելի լավ հանդես գա և բարձրացնի օգտակար գործողության գործակիցը: Պետք է ամբողջ խաղը անցկացնի բարձր նոտայի վրա, այլ ոչ թե դա անի դրվագներով: Հայ ֆուտբոլիստը 4 ամիս ժամանակ ունի հռոմեական թիմի ղեկավարությանը ավելին ցույց տալու և համոզելու, որ ձեռք բերեն իր տրանսֆերային իրավունքները «Արսենալից»»:
Երեկվա հանդիպումից հետո Մխիթարյանի դիրքերը «Ռոմայում» ավելի ամրացան։ Չմոռանանք, որ հռոմեական ակումբը Ա սերիային զուգահեռ հանդես է գալիս նաև Եվրոպա լիգայում։ Մխիթարյանի առաջնային խնդիրը «Ռոմայի» տիտղոս նվաճելու ճանապարհին ներդրում ունենալն է։ Եթե մեր ֆուտբոլիստը շարունակի նույն ոգով խաղալ, վստահ ենք, որ իտալական ակումբը միջոցներ չի խնայի նրա տրանսֆերը ձեռք բերելու համար։