Փետրվարի 18-ին հերթական անգամ հետաձգվեց 2008թ. մարտի 1-ին սահմանադրական կարգը տապալելու մեղադրանքով ազատազրկված ՀՀ երկրորդ նախագահ Ռոբերտ Քոչարյանի և մյուսների դատավարությունը։ Հերթական անգամ դատական նիստը հետաձգվեց մեղադրյալներից Յուրի Խաչատուրովի թարգմանչի բացակայության պատճառով։ Հաջորդ դատական նիստը տեղի կունենա վաղը՝ փետրվարի 25-ին։
Նույն օրը ՀՀ վերաքննիչ դատարանը բավարարեց նույն գործով մեղադրյալ, ՀՀ երկրորդ նախագահի աշխատակազմի նախկին ղեկավար Արմեն Գևորգյանի պաշտպանի բողոքը՝ վերացվեց նրա ազատ տեղաշարժի իրավունքի սահմանափակումը։
Արդյոք սա չի՞ նշանակում, որ Մարտի 1-ի գործը կարող է հայտնվել փակուղում։ Ո՞րն է երաշխիքը, որ Արմեն Գևորգյանն էլ Հոկտեմբերի 27-ի գործով դատավոր Սամվել Ուզունյանի, գործարար Սամվել Մայրապետյանի, ԱԺ ՀՀԿ-ական պատգամավոր, նախկին գլխավոր դատախազ Գևորգ Կոստանյանի և մի շարք այլ նախկինների հետքերով չի գնա, չի հայտնվի արտերկրում՝ խուսափելով քրեական պատասխանատվությունից։
Մարտի 1-ի, Նորք-Մարաշի բանդայի, «Սասնա ծռեր»-ի գործերով փաստաբան Հարություն Բաղդասարյանը «Առաջին լրատվական»-ի հետ զրույցում նշեց, որ մեղադրյալի իրավունքի սահմանափակումը կամ դրա վերացումը որոշում է դատարանը, այն քննարկվում և լուծվում է իրավական հարթությունում։
Ինչ վերաբերում է Ռոբերտ Քոչարյանի դատը պարբերաբար հետաձգելուն, ապա Հարություն Բաղդասարյանը նկատում է, որ դրանք վարույթային խնդիրների հետ են կապված։
«Ինչո՞ւ դատարանը թարգմանչի մասնակցությունը բացառող հանգամանք համարեց, դա էլ երկրորդ խնդիրն է։ Ինձ թվում է, որ դատախազությունը կարող էր միջնորդել, որ կարող են նաև առանց թարգմանչի դատն անցկացնել, եթե ամբաստանյալը դրա համաձայնությունը տալիս է։ Ես չգիտեմ՝ ամբաստանյալը դրա համաձայնությունը տվե՞լ է, թե՞ ոչ, բայց դատարանն իրավունք ուներ առանց թարգմանչի դատը սկսել։ Չէ՞ որ ամբաստանյալը տիրապետում է բանավոր խոսքին, կարող էր միջնորդել, որ դատն ընթանա։ Ինչո՞ւ չեն շարունակում դատը՝ դա էլ է կախված դատարանի հայեցողությունից։ Դատարանը չի ցանկանում իրականացնել այնպիսի գործողություն, որ վաղը-մյուս օրը իր վրա խոսակցություն լինի, ասեն, թե առանց թարգմանչի դատն անցկացնելով օրենք է խախտել։ Զգացվում է, որ երկու կողմերն էլ համաձայն են նիստերը հետաձգելուն։ Ենթադրում եմ, որ եթե կողմերից որևէ մեկը շահագրգիռ լիներ նիստը շարունակելու, ապա կմիջնորդեր, որ նիստը շարունակվի»,- ասաց Հարություն Բաղդասարյանը։
Թե ինչու է դատարանն էլ շահագրգռված նիստերը հետաձգելու հարցում՝ փաստաբանը նկատում է, որ միգուցե բոլորը սպասում են քաղաքական իրավիճակի փոփոխությանը, հստակեցմանը, այդ պատճառով էլ նիստը հետաձգվում է։
«Ըստ էության՝ գործը չի քննվում, քննվում է միայն էպիզոդային, խափանման միջոցը փոխելու, մեղադրանքը վերացնելու հարցով։ Այսօր տեսնում են, որ քաղաքական իշխանությունը թույլ վիճակում է, օգտվում են դրանից։ Քոչարյանի պաշտպանները մտածում են, որ քաղաքական իրավիճակը կարող է փոխվել երկրում, օգտվում են այդ առիթից»,- կարծում է փաստաբանը։
Նա ենթադրում է, որ դատական հանգուցալուծումը կարող է լինել քաղաքական դաշտում. քաղաքական իշխանությունը եթե որոշի դատել Ռոբերտ Քոչարյանին՝ նա դատվելու է, եթե որոշի չդատել՝ չի դատվելու։
