Վենեսուելայի երեք բնակիչներից մեկը բախվում է մինիմալ սննդային պահանջները բավարարելու խնդրին, հայտնում է Associated Press գործակալությունը՝ վկայակոչելով ՄԱԿ-ի Պարենի համաշխարհային ծրագրի ուսումնասիրությունը:
Ըստ ուսումնասիրության՝ Վենեսուելայում բնակվող 31,98 միլիոնից մոտ 9,3 միլիոն մարդ զգում է սննդի չափավոր կամ լուրջ պակաս: Ընդ որում, սննդի պակաս են զգում ոչ միայն աղքատ նահանգները, այլ նաև համեմատաբար բարեկեցիկ շրջանները, որտեղ աղքատության հետ բախվում է մոտավորապես յուրաքանչյուր հինգերորդ վենեսուելացին: Վենեսուելայի շատ բնակիչների սննդակարգի հիմնական մաս կազմում են պալարներն ու լոբազգիները, գրում է AP-ն:
Սակայն խնդիրը ոչ այնքան սննդի սակավության մեջ է, որքան դրա արժեքի: Տաս հարցվածներից յոթը նշել են, որ սնունդ գտնել միշտ կարելի է, բայց բարձր գների պատճառով դժվար է այն գնել:
Նշենք, որ Վենեսուելայում շարունակվում է հիպերինֆլյացիայով ուղեկցվող հումանիտար ճգնաժամը, որն էլ իր հերթին հանգեցրել է քաղաքական ճգնաժամի:
