ՀՅ Դաշնակցությունն ու «Լուսավոր Հայաստան»-ը պատրաստակամություն են հայտնել օգնելու «Ոչ»-ի քարոզչության կողմին տեղամասային հանձնաժողովներում անդամներ նշանակելու հարցում, «Ազատություն» ռադիոկայանի հետ զրույցում այս մասին ասել է «Ոչ»-ի ճակատի ներկայացուցիչ Ռուբեն Մելիքյանը։
Տեղամասային ընտրական 7 հոգանոց հանձնաժողովում ինչպես «Այո»-ի, այնպես էլ՝ «Ոչ»-ի կողմը 2-ական անդամ նշանակելու իրավունք ունի։ Խոսքը յուրաքանչյուր կողմից 4016 անդամի մասին է։ Իսկ անուններ ներկայացնելու վերջնաժամկետը մարտի 1-ն է։
Քաղաքական և ընտրական տեխնոլոգիաների փորձագետ Արմեն Բադալյանը այս որոշումը զարմանալի չի համարում, նշում է՝ առաջիկայում կարող է այլ ուժեր ևս նման պատրաստակամություն հայտնեն.«Քանի որ ոչ մի քաղաքական ուժ չձևավորեց «Ոչ»-ի շտաբ, այդ պարտակամությունն իրենց վրա վերցրեցին իրավաբաններ ու իրավապաշտպաններ, բնական է իրենց անհրաժեշտ էին լինելու քաղաքական ուժերի ներկայացուցիչներ՝ տեղամասային հանձնաժողովներում նշանակելու համար։Այդ ուժերը հայտնել են, որ «Ոչ»-ի շտաբ չեն ձևավորում, բայց ունեն հստակ դիրքորոշում, ուստի կարող են իրենց ներկայացուցիչներին ուղարկել այդ տեղամասեր»։
Բադալյանը միևնույն ժամանակ ընդգծեց, որ հիշյալ քաղաքական ուժերի այսօրինակ դիրքորոշումը իրենց քաղաքական ապագայի վրա էական անդրադարձ չի ունենա.«Իրենք պաշտոնապես ասել են, որ «Ոչ»-ին չեն աջակցում, զարմանալի որևէ բան չկա։ Ես նաև չեմ բացառում, որ այս քարոզարշավի ընթացքում այլ քաղաքական ուժեր ևս իրենց բացասական դիրքորոշումը հայտնեն ու աջակցություն ցուցաբերեն»։
Ավելի ազնիվ չէ՞ր լինի այդ դեպքում ձևավորել «Ոչ»-ի շտաբ, դիտարկմանն ի պատասխան մեր զրուցակիցն ասաց.«Չեմ կարծում, որ անզիվ լինելու հարց է։ Խնդիրն այն է, որ իշխանություններն այս քարոզարշավը վերածելու էին սև ու սպիտակի պայքարի և եթե որևէ կուսակցություն ձևավորեր «Ոչ»-ի շտաբ, ապա անմիջապես կաշխատեր իշխանությունների կողմից գծված սցենարը՝ այն է սև ու սպիտակի բաժանումը, ինչը հնարավորություն կտար իշխանություններին մոբիլիզացնել իր կողմնակիցներին ու շատ հեշտությամբ ստանալ ցանկալի արդյունք։ Իսկ քանի որ այդ ուժերը չձևավորեցին «Ոչ»-ի շտաբ, իշխանությունների այդ ծրագիրը չի աշխատելու։ Դու չես կարող փաստաբաններին «սև» ներկայացնել, առավել ևս, երբ նրանց մեջ կա մարդ, ով ժամանակին պաշտպանել է հենց Նիկոլ Փաշինյանի շահերը, երբ նախկինում իշխանությունները իր դեմ դատական գործընթաց էին սկսել։ Այսինքն հարցն այստեղ ազնվությունը չէ, գործել է քաղաքական նպատակահարմարությունն ու ռացիոնալիզմը»։
Հարցին՝ այսինքն բացահայտ չեն ձևավորել «Ոչ»-ի շտաբ, որպեսզի «սև» չդառնան, քաղտեխնոլոգն արձագանքեց.«Այդպես է ստացվում։ Ոչ թե ԼՀԿ-ն չուզեց սև դառնալ, գուցե մի քիչ դավադրապաշտական տեսությունից կարող է լինել ասածս, բայց ոնց որ տեսնում էինք ԼՀԿ-ն ուզում էր «Ոչ»-ի շտաբ ձևավորել, բայց երբ չստացավ ընդդիմադիր այլ ուժերի աջակցություն՝ հետ կանգնեց։ Միգուցե «Լուսավոր Հայաստանը» գնար նաև իշխանությունների հետ քաղաքական առևտրի, որոշ դեպքերում նման դիրքորոշում դրսևորել է։ Գուցե նաև իշխանությունները ցանկանային, իհարկե նաև ԼՀԿ-ի համաձայնությամբ, որ իրենք ձևավորեին «Ոչ»-ի շտաբ։ Բայց երբ դու այդ շտաբը ձևավորում ես՝պետք է ընդհանուր բոլոր ընդդիմադիր ուժերի աջակցությունը ստանաս։ Իսկ երբ չես ստանում այդ աջակցությունը, նրանք էլ են քեզ քննադատում, իշխանություններն էլ՝ նորից չէր աշխատելու իշխանությունների «սև ու սպիտակի» տեխնոլոգիան»,-եզրափակեց մեր զրուցակիցը։
«GALLUP International association»-ի հայաստանյան ներկայացուցչության տնօրեն Արամ Նավասարդյանը «Առաջին լրատվական»-ի հետ զրույցում կարծիք հայտնեց, որ տվյալ կուսակցությունների այսօրինակ դիրքորոշումն իրենց վարկանիշի վրա ազդեցություն կունենա, իսկ թե ինչպիսի ազդեցություն՝ առայժմ դժվար է ասել.«Բոլոր քաղաքական ուժերն իրենց դիրքորոշումն ունեն՝ մեկը «Ոչ»-ին է օգնում, մեկը բոյկոտելու կոչ է անում, մյուսն «Այո»-ի կողմնակից է։ Մենք Մարտի 10-20-ը ընկած ժամանակահատվածում հարցումներ կանենք ու կպարզենք,թե քաղաքացիները որ դիրքորոշման հետ կապված ինչ կարծիք ունեն»։
Նավասարդյանը նկատեց՝ համարյա մեկ շաբաթ է քարոզարշավը մեկնարկել է, բայց ակտիվ քարոզչություն առայժմ չի իրականացվում.«Կտեսնենք, թե ինչ ընթացք կունենա քարոզարշավը, որ ուժն իրեն ինչպես կդրսևորի։ Անշուշտ քաղաքացիները կարդում ու տեսնում են բոլոր հայտարարությունները և իրենց գնահատականն ըստ այդմ կներկայացնեն, մենք էլ այն կհրապարակենք»։
