Սանկտ Պետերբուրգի բնակիչ Զինաիդա Բելիկովան, որը Ռուսաստանի նախագահ Վլադիմիր Պուտինին հարցրեց, թե ինչպես կարելի է տասը հազար ռուբլով ապրել, աշխատանք գտավ բժշկական կլինիկայում: Այս մասին հաղորդել է Սանկտ Պետերբուրգի հեռուստաալիքը:
Նման առաջարկով թոշակառուին դիմեց քաղաքի Պրիմորսկի շրջանի վարչակազմի ղեկավարը: Նա համաձայնել է աշխատել, նշում է հեռուստաալիքը: Բելիկովան վարորդի հետ մեքենայով բժշկական փաստաթղթեր կառաքի: Թե որքան կլինի նրա աշխատավարձը, չի հստակեցվում:
Իշխանությունները աշխատանք են առաջարկել նաև կնոջ՝ զենիթա-հրթիռային ուժերում ծառայությունից վերադարձած 22-ամյա որդուն: Նրան առաջարկել են շտապօգնության վարորդի թափուր տեղը: Բացի դրանից, շրջանի ղեկավարությունը խոստացավ վերանորոգել Բելիկովայի բնակարանը:
Բելիկովան հարց է ուղղել Պուտինին փետրվարի 19-ին, երբ վերջինս Անատոլի Սոբչակի հուշարձանի մոտ ծաղիկներ դնելուց հետո գնացել էր զրուցելու Սանկտ Պետերբուրգի բնակիչների հետ: Մի կին նրան հարցրեց, թե ինչպես կարելի է ապրել 10 հազար 800 ռուբլի կենսաթոշակով: «Կարծում եմ, որ շատ դժվար կլինի», – պատասխանեց նախագահը:
Թոշակառուն դժգոհեց, որ պետության սահմանած գումարով սնունդ գնել հնարավոր չէ, և ենթադրեց, որ Պուտինը շատ աշխատավարձ է ստանում: «Ոչ միայն ես: Շատ ավելի բարձր աշխատավարձեր կան: Նախագահի աշխատավարձը ամենաբարձրը չէ»,- պատասխանեց Պուտինը: