Գնահատելով ՀԱԿ-իշխանություն երկխոսությունը՝ «Ազգ» օրաթերթի գլխավոր խմբագիր Հակոբ Ավետիքյանը նկատեց, որ 2008 թվականից մինչ այսօր մեծ ոստյուն է կատարվել ներքին մթնոլորտի հանդարտեցման իմաստով, սակայն ժողովրդի կյանքում փոփոխություններ, ըստ «Ազգ»-ի խմբագրի, այնքան էլ չեն նկատվի. «Այդ երկխոսությունից ես արևելյան բազարի տպավորություն եմ ստանում. այստեղ երկուսն էլ վաճառող են, երկուսն էլ՝ գնորդ: Այդ երկխոսությունը իշխանության համար ընդդիմությանը փչացնելու միջոց է, իսկ ընդդիմությունը գնաց երկխոսության՝ ասելու համար, որ գնաց այդ քայլին»: Ըստ Ավետիքյանի՝ ընդդիմության հարմարվողական գործելաոճը հիասթափություն կառաջացնի հասարակության մեջ:
Հրապարակախոս Տիգրան Պասկևիչյանը իր խոսքում նշեց, որ զարմանում է, թե ինչ այլ փոփոխությունների են սպասում, եթե ՀԱԿ-ի առաջադրած ոչ մի պահանջ չի շրջանցվել. «ՀԱԿ-ը հստակ դրել է արտահերթ ընտրությունների հարցը, որովհետև երկրի ծանր վիճակը ստեղծվել է հենց կեղծված ընտրությունների արդյունքում»: Պասկևիչյանի խոսքով՝ մեծ ընդգրկում ունեցող արտագաղթը կապ չունի այս պրոցեսների հետ, մինչդեռ Ավետիքյանը կարծում է, որ ստեղծված իրավիճակը արտագաղթողների համար պատճառաբանության լավագույն ատաղձն է: Պասկևիչյանը նաև հավելեց, որ մեծ տարբերություն կա արտահերթ և հերթական ընտրությունների միջև այն իմաստով, որ արտահերթի դեպքում ԿԸՀ-ին ոչ ոք կեղծելու երաշխիքներ չի տալու։ Նա նաև վստահեցրեց, որ իշխանությունները, ի վերջո, գնալու են արտահերթ ընտրությունների։ Մինչդեռ Հակոբ Ավետիքյանը նշեց, որ հասարակությունը պատրաստ չէ արտահերթ ընտրությունների. «Հասարակությունը ոչ մի ընտրության մասին չի ուզում մտածել»:
«Եթե երկխոսությամբ չբավարարվեն ՀԱԿ-ի պահանջները, ընդդիմությունը աշնանը ժողովրդին ոտքի կհանի հեղափոխության ճանապարհով»,- եզրափակեց Տիգրան Պասկևիչյանը