2019թ-ին տնտեսական աճը Հայաստանում կազմել է 7․6 %՝ այսպիսով գրանցելով ամենաբարձր աճը նախորդ տասներկու տարիների ընթացքում։ Հայաստանի վիճակագրական կոմիտեի համաձայն, համախառն ներքին արդյունքի (ՀՆԱ) նման բարձր աճ չի գրանցվել 2007 թ-ից ի վեր։ Ըստ Վիճակագրական կոմիտեի օրերս հրապարակած տվյալների՝ առավել բարձր աճ է գրանցվել արդյունաբերության ոլորտում՝ 10․2 %, առևտրի և ծառայությունների ոլորտում գրանցվել է 10․1 % աճ, շինարարության ոլորտում՝ 4․2 % աճ, իսկ գյուղատնտեսության անկումը շարունակվել է և տարեկան կտրվածքով կազմել է 4 %։
Ընդհանուր առմամբ՝ 2019թ-ի ընթացքում Հայաստանի ՀՆԱ-ն կազմել է մոտ 6 տրիլիոն 551 միլիարդ 850 միլիոն դրամ։
Փետրվարի 20-ին տեղի ունեցած կառավարության նիստում վարչապետ Նիկոլ Փաշինյանը վստահեցրեց, որ իր գլխավորած կառավարությունը կկարողանա 2020թ-ի համար ավելի բարձր ցուցանիշ արձանագրել։
«Կարող ենք արձանագրել հետևյալը, որ 2019 թ-ին եթե 7․6 % է, դա նշանակում է, որ 2008 թ-ից ի վեր ամենամեծ տնտեսական աճն ենք արձանագրել 2019 թ-ին, ինչի կապակցությամբ բոլորիս շնորհավորում եմ։ Համոզված եմ, որ մեր համատեղ աշխատանքի արդյունքում 2020 թ-ին ավելի մեծ ցուցանիշ կարձանագրենք»,- մասնավորապես հայտարարեց վարչապետը։
Հատկանշական է, որ 2019թ-ի համար պետական բյուջեով կանխատեսվում էր 4․9 % տնտեսական աճ, մինչդեռ հրապարակված տվյալների համաձայն՝ Հայաստանը զգալիորեն ավելի բարձր ցուցանիշ արձանագրեց։
Տնտեսագետ Հայկազ Ֆանյանը կարծում է, որ 7․6 % տնտեսական աճի մի մասը պայմանավորված է ստվերի կրճատմամբ և մյուս մասն է միայն, որ իրենից ներկայացնում է զուտ տնտեսական աճը։
«Նախ գովելի է, որ Վիճակագրական կոմիտեն տուրք չտալով վարչապետի ավելի վաղ արված հայտարարություններին՝ 8 % ՀՆԱ-ի հավելաճի տեմպի վերաբերյալ, հայտարարեց, որ նախնական տվյալներով 2019թ-ի ՀՆԱ-ի հավելաճի տեմպը 7.6% է։ Սա չեզոքացրեց այն պնդումները, թե քաղաքական իշխանությունները Վիճակագրական կոմիտեի վրա ճնշում են գործադրում կամ փորձում են գործադրել, համենայն դեպս, այդ «ճնշման» արդյունքները չեն երևում»,- «Առաջին լրատվական»-ի հետ զրույցում ընդգծեց Հայկազ Ֆանյանն ու հավելեց․
«Ինչ վերաբերում է 7․6 %-ին, ապա կարծում եմ, որ այստեղ իր բաղկացուցիչ մասնաբաժին ունի ստվերի կրճատումը ու մի քանի այլ գործոններ, սակայն, այսուհանդերձ, 6 % և ավել ՀՆԱ-ի իրական ծավալի աճը Հայաստանի նման երկրի համար վատ ցուցանիշ չէ, ավելին՝ կասեի, որ անգամ բավականին լավ ցուցանիշ է և ես սա դրական եմ գնահատում»։
Տնտեսագետից հետաքրքրվեցինք նաև, թե ի՞նչ ակնկալիքներ կարող ենք ունենալ 2020թ-ի համար, արդյո՞ք այս տարվա համար առավել բարձր ցուցանիշների կարող ենք սպասել՝ ինչպես խոստանում է վարչապետը, ինչպես նաև այն դեպքում, երբ, օրինակ, միջազգային ֆինանսական կառույցները 2020թ-ի համար Հայաստանի տնտեսական աճը կանխատեսում են շուրջ 5 %-ի շրջակայքում։
Այս համատեքստում Ֆանյանը ի պատասխան նշեց, որ դեռևս չպետք է շտապել գնահատել 2020թ-ը, սակայն ինքը դեռևս հակված չէ կարծելու, որ ընթացիկ տարվա ավարտին հնարավոր կլինի արդեն իսկ արձանագրված 7.6%-ից ավելի բարձր ցուցանիշ գրանցել։
Նրա դիտարկմամբ՝ միջազգային կառույցները, որպես կանոն, իրենց կանխատեսումների մեջ շատ կոնսերվատիվ (պահպանողական) են լինում և զուսպ են գնահատականների «շռայլման» հարցում։
«Ես համոզված եմ, որ 2020թ-ին մենք կունենանք ավելի քան 5% ՀՆԱ-ի իրական ծավալի աճ, սակայն միևնույն ժամանակ չեմ կարծում, թե ունենք մեծ հնարավորություններ 8% և ավել տնտեսական աճ գրանցելու համար։ Սա իմ նախնական կանխատեսումն է և, երբ հրապարակվի 2018թ-ի վերջնական ցուցանիշները և կհասկանանք իրավիճակն իրականում ինչ փոփոխությունների է ենթարկվել՝ այդ ժամանակ էլ կարող ենք ավելի հստակ կանխատեսումներ անել 2020թ-ի համար, սակայն կրկնում եմ, որ դեռևս իմ նախնական գնահատականով՝ 2020թ-ի համար 8% տնտեսական աճ գրանցելու հավանականությունը շատ քիչ եմ համարում, բավարար հիմքեր դրա համար դեռևս չեմ տեսնում»,-եզրափակեց տնտեսագետը։
Հիշեցնենք նաև, որ 2018թ-ին տնտեսական աճը Հայաստանում կազմել էր 5․2 % ։