«Գաբրիել Սունդուկյանի անվան ազգային ակադեմիական թատրոնը իր գոյության 98 տարիների ընթացքում դարձել է ազգային հարստություն»,- «Առաջին լրատվական»-ի հետ զրույցում ասաց թատրոնի տնօրեն Վարդան Մկրտչյանը: Անդրադառնալով հարցին, թե ինչ է փոխվել վերջին երկու տարիներին, Վ. Մկրտչյանն ընդգծեց, որ փոխվել է թատրոնի առաջ շարժվելու տեսիլքը, ինչը մեծ ճիգեր է պահանջելու. «Թատրոնը պետք է դեմքով նայի դեպի 21-րդ դար, այ սա է, որ փոխվել է թատրոնում»:
Վարդան Մկրտչյանի հավաստմամբ՝ թատրոնում բեմադրվում են ներկայացումներ, որոնք արդիական են: «2019թ. մենք բեմականացրեցինք «Թռիչք կկվի բնի վրայով» ներկայացումը, որը ստացված ժամանակակից ներկայացում է և՛ իր բարձրաձայնած խնդրով, և՛ իր կատարման եղանակով ու ձևով: Մենք հավատարիմ մնացինք բնագրին և հաղթող դուրս եկանք, դրա վկայությունն այն է, որ ներկայացումն արդեն ունի ձևավորված հասարակական կարծիք, որը դրական է»:
«Մենք նաև համարձակ մանկական ներկայացումներ ենք բեմադրում, որով փոխել ենք մանկական ներկայացման մշակույթը: Բեմադրել ենք «Ալադինը» և «Սառցե սիրտը»: «Ալադինը» ներկայացումն ուղղակի ռեկորդներ է սահմանում: Միայն 2020թ. հունվարին Սունդուկյանի անվան ազգային ակադեմիական թատրոնն ունեցել է 23 213 հանդիսատես և առավել քան 26 միլիոն դրամի մուտք»,- նշեց մեր զրուցակիցը՝ հավելելով, որ վերջին տասնամյակներում նման փաստ չի արձանագրվել, և սա վկայում է այն մասին, որ թատրոնի վարած քաղաքականությունը ճիշտ է:
«Մենք գործ ունենք 21-րդ դարի մարդու հետ, որն ունի իր պահանջները, նրա տեսալսողական պահանջները բոլորովին այլ են, և մենք չենք կարող հանդիսատեսի հետ խոսել 20-րդ դարի թատրոնի լեզվով, պետք է խոսենք նոր լեզվով և հնացած տեսակետից պետք է դուրս գանք,- նշեց Վարդան մկրտչյանը՝ հավելելով, որ թատրոնում պետք է կատարել մեծ ներդրումներ՝ առանց վախենալու, որ դա արդարացված կլինի:
Մանրամասն՝ տեսանյութում:
