Փաշինյան-Ալիև մյունխենյան հանդիպման շուրջ կրքերը չեն հանդարտվում, դեռ շարունակում են քննարկել, քննադատել կամ գովաբանել՝ կախված նրանից, թե հարցին անդրադարձողը որ ճամբարի ներկայացուցիչ է: Ինչո՞վ է պայմանավորված այս մեծ ուշադրությունը. նրանով, որ աննախադեպ երևո՞ւյթ էր, թե՞ բովանդակային գործոնով:
«Առաջին լրատվական»-ի հետ զրույցում անդրադառնալով այս հարցին՝ Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը նշեց, որ երկու գլխավոր գործոնն էլ առկա են. «Աննախադեպ էր Հայաստանի և Ադրբեջանի ղեկավարների հրապարակային բանավեճը, բացի դրանից՝ բովանդակություն կար: Մյունխենում Փաշինյանը մերժեց Ալիևին: Ալիևը տարածքների հարց բարձրացրեց և ստացավ սպառիչ պատասխան, և այդ պատասխանը ներառված է նաև մյունխենյան սկզբունքների մեջ. «դրանք մեզ համար տարածքներ չեն, այլ անվտանգություն են»: Այդ պատասխանից Ալիևը կատաղած էր, շատ ագրեսիվ խոսեց: Դա առաջին դրական հանգամանքն էր և շատ կարևոր մեսիջ էր հանրությանը, որ ոչ մի զիջում չի լինի: Եվ այդ հարցը շահարկելն անիմատ դարձավ, ինչպես տեսնում եք, դադարել են շահարկել, հիմա շահարկում են այլ հարցեր»:
Ստեփան Գրիգորյանի դիտարկմամբ՝ գործող իշխանությունը պետք է զգույշ լինի արտահայտություններ անելիս, մանավանդ երբ գործ ունի սադրիչի հետ: Քաղաքագետի կարծիքով՝ «անվտանգություն» եզրույթի գործածումը՝ տարածքների համատեքստում, շատ ճիշտ էր և միջազգային հանրության համար ընկալելի:
Գլոբալիզացիայի և տարածաշրջանային համագործակցության վերլուծական կենտրոնի ղեկավարի կարծիքով՝ Փաշինյան-Ալիև հանդիպման ընթացքում շատ կարևոր էր նաև այն, որ Ալիևի սփռած մի շարք ստերին Փաշինյանը համարժեք պատասխան տվեց և հերքեց:
Մանրամասն՝ տեսանյութում: