Ստամբուլում տեղի է ունեցել «Ակոս» թերթի հիմնադիր-խմբագիր Հրանտ Դինքի սպանության գործով 2013-ին վերաբացված դատավարության հերթական նիստը:
Վերաբացված դատական գործին ներգրավված են պետական մի շարք նախկին պաշտոնյաներ ու ուժային կառույցների ղեկավարներ: Սամսունի ժանդարմերիայի նախկին հրամանատար Սերդար Յուջելը, որը որպես վկա է հանդես գալիս, խոստովանել է, որ Դինքին սպանած Օգյուն Սամասթին՝ ժանդարմերիայի շենքում լուսանկարվելու հրամանը ինքն է տվել: Նա սակայն ասել է, որ ինքը չի հրամայել Սամասթին նկարել Աթաթուրքի պաստառի ֆոնին՝ Թուրքիայի դրոշը պարզած:
Հակառակն է պնդել սակայն այդ ժամանակ Սամսունի ժանդարմերիայում ծառայող և Սամսունի ավտոկայանում հանցագործին ձերբակալած Բիրոլ Ուսթաօղլուն, որն այդ նկարում Սամասթի կողքին է կանգնած: Ուսթաօղլուն նշել է, որ թե՛ լուսանկարվելու, և թե՛ տեղն ընտրելու համար հրաման է ստացել վերադասից:
Հիշեցնենք, որ Հրանտ Դինքին սպանած Սամասթը դեպքի վայրից փախուստի էր դիմել, իսկ ավելի ուշ հայտնաբերվել ու ձերբակալվել էր Սամսունում:
Ձերբակալությունից հետո, տեղի ժանդարմերիայի բաժանմունք տեղափոխված Սամասթը, ժանդարմերիայի երկունծառայողի հետ լուսանկարվել էր թուրքական դրոշով՝ պատին ամրացված Մուսթաֆա Քեմալ Աթաթուրքի նկարի ֆոնին, որի վրա գրված է «Հայրենի հողը սուրբ է և չի կարող թողնվել ճակատագրի քմահաճույքին»:
