«Այո»-ի քարոզչությունը միայն համացանցային չի լինի և չի սահմանափակվի հեռուստատեսային դեբատներով: Այս մասին «Առաջին լրատվական»-ի հետ զրույցում հավաստիացրեց ԱԺ «Իմ քայլը» խմբակցության պատգամավոր, Եվրոպական ինտեգրման հարցերի մշտական հանձնաժողովի նախագահ Արման Եղոյանը՝ ընդգծելով. «Մենք շփվելու ենք մարդկանց հետ, գնալու ենք դռնեդուռ, քաղաքից քաղաք, գյուղից գյուղ: Փորձելու ենք իրավաբանական խրթին տերմինաբանությունից զատ մարդկանց հստակ ներկայացնել, թե ինչ է իրենից ներկայացնում այս հանրաքվեն»:
«Գործ ունենք գերկարևոր խնդրի հետ՝ իշխանության ճյուղերից մեկի՝ դատական իշխանության ինչպիսին լինելու խնդրի հետ: ԱԺ-ն կարող էր կոճակի մեկ հպումով ՍԴ անդամների լիազորությունները դադարեցնել, բայց դա սխալ կլիներ, դրա համար այս հարցի լուծումը պատվիրակվել է սահմանադրին՝ ժողովրդին: ՀՀ Սահմանադրության 2-րդ հոդվածում հստակ ասվում է, որ իշխանությունը պատկանում է ժողովրդին, և ժողովուրդն այն կարող է իրացնել նաև հանրաքվեի միջոցով, դա էլ գործիք է և ժողովրդավարական գործիք. այն չի կարող լինել հակասահմանադրական»,- նշեց Ա. Եղոյանը՝ հավելելով, որ հանրաքվեի մասին օրենքը հստակ ասում է, թե որ հարցերը կարող են դրվել և որոնք չեն կարող դրվել հանրաքվեի:
Պատգամավորի դիտարկմամբ՝ հանրաքվեի դրական արդյունքը անհրաժեշտ, բայց ոչ բավարար պայման է անկախ դատական համակարգ ունենալու համար. «Դատական համակարգը միայն ՍԴ-ն չէ, բայց ՍԴ այս կազմը, մասնավորապես ՍԴ գործող ղեկավարը, իր քաղաքական դիրքավորմամբ, ամենամեծ խոչընդոտն է դատական համակարգի ձևավորման համար:
Մեր զրուցակիցը նաև ընդգծեց, որ «Ոչ»-ը ասելիք չունի. «Փորձում են դելեգիտիմացնել պրոցեսը»:
Մանրամասն՝ տեսանյութում:
