Հալեպի միջազգային օդանավակայանը փետրվարի 19-ին վերսկսել է իր աշխատանքն ութամյա ընդմիջումից հետո և առաջին չվերթն ընդունել Դամասկոսից:
Հալեպի և Դամասկոսի միջև տարածությունը կազմում է մոտավորապես 370 կիլոմետր, նախքան սիրիական ճգնաժամը ինքնաթիռներն այդ տարածությունը հաղթահարում էին մոտավորապես 50 րոպեում: Առաջին չվերթով Հալեպ է ժամանել 120 ուղևոր, այդ թվում՝ տրանսպորտի նախարար Ալի Համուդը և զբոսաշրջության նախարար Մուհամադ Մարտինին:
Սիրիայի տրանսպորտի նախարարության հաղորդման համաձայն՝ առաջիկա օրերին նախատեսվում է կանոնավոր չվերթներ սկսել դեպի Դամասկոս և Եգիպտոսի մայրաքաղաք Կահիրե:
Օդանավակայանը բացվել է սիրիական բանակի գործողությունների շնորհիվ. փետրվարի 16-ին այն 2013 թվականից ի վեր առաջին անգամ լիակատար հսկողություն է հաստատել Հալեպի շրջակա բոլոր բնակավայրերի նկատմամբ՝ դրանով իսկ քաղաքը վտանգազերծելով զինյալների՝ արդեն կանոնավոր դարձած հրետակոծումներից: