Վերջին մեկուկես ամսվա ընթացքում բանակում գրանցված մահվան դեպքերը փաստեցին, որ զինված ուժերում անհրաժեշտ են արմատական փոփոխություններ և բարեփոխումներ: Թեմայի շուրջ զրուցելու համար «Առաջին լրատվական»-ը հյուրընկալել է իրավապաշտպան Ժաննա Ալեքսանյանին և Նինա Կարապետյանցին:
Ժաննա Ալեքսանյանը կարծում է, որ փոփոխությունները պետք է սկսել բարձր օղակներից. «Բանակը փակ համակարգ է, և այնտեղ կարգուկանոնը պետք է գործի: Զորամասի հրամանատարների թողտվությամբ են բանակում գործում ոչ ֆորմալ կառույցները՝ այդ, այսպես կոչված, յախշիները, դիվիզիայի նայողները»:
Նա անդրադարձավ Արծրուն Հովհաննիսյանի արտահայտությանը, թե՝ բանակը ուժեղների համար է. «Այսինքն՝ թույլերին հավանաբար պետք է ոչնչացնել, և այդպես էլ արվում է: Եթե անգամ ենթադրենք, որ բանակում տեղի ունեցողը ինքնասպանություններ են, ուրեմն բանակում տիրում է բռնի մթնոլորտ, որը ոչ ոք չի ուզում վերացնել. ուժեղները շատ հարմարավետ տեղավորվել են, իսկ թույլերը ուղղակի դուրս են մղվում»:
Նինա Կարապետյանցն էլ կարծում է, որ անգամ վարչապետի մոտ կանչվելուց հետո որևէ մեկը որևէ դաս չի քաղել. «Ի՞նչ է նշանակում Գլխավոր շտաբի պետի հայտարարությունը, թե 4 հոգի առողջական խնդիրներ են ունեցել. դա նշանակում է՝ կամ նրանց հիվանդ տարել են ծառայության, կամ տեղում ձեռք են բերել որոշակի հիվանդություններ, որոնք բուժում չեն ստացել: Սա արդեն անմեղսունակության հասնող իրավիճակ է»:
Նա ընդգծեց՝ տեսել են այդ «համապարփակ, խորը, ընդլայնված» քրեական գործերը. «Մենք տեսնում ենք, որ սևազգեստ մայրերը մինչև այսօր իրենց մեջ ուժ են գտել և պայքարում են իրենց երեխաների սպանության դեպքերը բացահայտելու համար, և կան հարյուրավոր, եթե ոչ՝ հազարավոր մայրեր, ովքեր համակերպվել են այդ մտքի հետ, որովհետև հասկացել են, որ որևէ արդյունքի չեն հասնելու»:
Ժաննա Ալեքսանյանը հավելեց. «Ես Հայաստանը համարում եմ անմարդկային երկիր. բացահայտ սպանությունը որակվում է ինքնասպանություն, որը մի խարան է, որը դնում են ընտանիքի վրա: Այդ քրեական ենթամշակույթը կրում են իրավապահ մարմինները»:
Հարցազրույցն ամբողջությամբ՝ տեսանյութում: