Կորեայի Հանրապետությունը որոշել է արգելել Diamond Princess-ի նախկին ուղեւորների մուտքը երկիր: Զբոսանավը 2 շաբաթ կարանտինի մեջ է կորոնովիրուսի պատճառով: Այս մասին հայտնում է ՏԱՍՍ-ը:
Ինչպես նշվում է, հանրապետության ԱԳՆ-ը արդեն հարցում է ուղարկել Ճապոնիա եւ խնդրել զբոսանավի ուղեւորների ամբողջական ցուցակը: Կորեայում ընդգծել են, որ մուտքի արգելքը նախազգուշական միջոցառում է, այն արվում է, որպեսզի չթույլատրվի կորոնովիրուսի տարածումը Կորեայի տարածքում:
Հայտնի է դարձել, որ երկրի 6 քաղաքացիներ Diamond Princess-ից տարհանվել են նախագահական ջոկատի օդանավով: Սեուլի օդանավակայանում նրանց մոտ ստուգել են կորոնովիրուսի առկայությունը: Բոլոր տարհանվածները առողջ են եղել, բայց նրանք գտնվում են բժշկական հսկողության տակ Ինչխոն օդանավակայանի շրջանի բժշկական հաստատություններից մեկում:
Նշվում է, որ զբոսանավում եղել են Կորեայի 14 քաղաքացի, նրանք, ովքեր մնացել են, տարհանման խնդրանքով չեն դիմել եւ զբոսանավը կլքեն այս շաբաթ: