Մյունխենում տեղի ունեցավ ոչ ստանդարտ ձևաչափով Փաշինյան-Ալիև հանդիպումը, որի արձագանքները մեր մոտ միանշանակ չէին։
Իսկ եթե այս ամենը նայենք եվրոպական լսարանի տեսանկյունից, այդ դեպքում ի՞նչ կունենանք․ «Առաջին լրատվական»-ի հարցին Հանրային խորհրդի նախագահ Ստյոպա Սաֆարյանը պատասխանեց․ «Նախօրեին Մյունխենի անվտանգության կոնֆերանսի կազմակերպիչ Վոլֆգանգ Իշինգերը հայտարարեց, որ, ըստ էության, այս կոնֆերանսի հաջողություններից մեկն այն է, որ Հայաստանի և Ադրբեջանի ղեկավարները երկար տարիներ հետո հանրային քննարկման վայրում նստեցին ու միմյանց հետ խոսեցին Ղարաբաղի հակամարտության մասին։ Նշեմ, որ եվրոպական հասարակությունն այդքան խստապահանջ չէ, որքան Հայաստանի ու Ադրբեջանի հասարակությունը։ Քանի որ դա առաջին փորձն էր և, բնականաբար, ինքնին այն հաջող համարվեց։ Իսկ բովանդակային մասով, իհարկե, չէի ասի, թե այդքան էլ ոգևորված են, որ Իլհամ Ալիևը տարավ պատմության քննարկման դաշտ, և Հայաստանի վարչապետը ստիպված էր հակադարձել պատմության ադրբեջանական վարկածներին։ Բայց, ընդհանուր առմամբ, պետք է ասեմ՝ շատ գոհ են, որ կա պրոցես, որ երկու երկրների ղեկավարները կարողանում են միմյանց դեմ նստել և, որքան էլ ունենան հակադիր դիրքորոշումներ, քննարկել խնդիրները։
Նման ֆորումները երբևիցե չեն լինելու հակամարտության կարգավորման մասին։ Դրանք շոուի էլեմենտներ են պարունակում՝ կան տեսախցիկներ, կա հանդիսատես, որը երբեմն-երբեմն ծափահարում է։ Այս կտրվածքով, իհարկե, հասկանալի է, որ բուն հանդիպումն ավելի շատ կողմերի դիրքորոշումները հասկանալու մասին էր, և կողմերը պետք է իրենց առաջնահերթությունները դնեին։ Ես պետք է ասեմ, որ Հայաստանի վարչապետը շատ արժանապատիվ է ներկայացել այդ քննարկմանը՝ անկախ նրանից, որ մեր շատ հայրենակիցներ գտնում են՝ այս մի բանի մասին չխոսվեց, այն մի բանի մասին չխոսվեց։ Եկեք մի բան հասկանանք՝ դա պատմության ստուգատես չէր, ու այնտեղ հավաքված մարդիկ չէին եկել պատմություն լսելու»։
Մանրամասները՝ տեսանյութում։
