Բանակի հարցը վերջին օրերին դարձել է Հայաստանում ամենաքննարկվող թեման, ինչը պայմանավորված է բանակում մահերի մտահոգիչ վիճակագրությամբ: Այդ առնչությամբ հասարակական-քաղաքական դաշտի արձագանքները բազմազան են՝ անկեղծ մտահոգությունից մինչև անբարո շահարկումներ, անգամ Հայաստանի պետական անվտանգության դեմ տեղեկատվական գրոհներ:
Վարչապետի մոտ խորհրդակցությունից հետո ԱԺ Մարդու իրավունքների պաշտպանության և հանրային հարցերի, ԱԺ Պաշտպանության և անվտանգության հարցերի մշտական հանձնաժողովների անդամներն այսօր զրուցել են Զինված ուժերի գլխավոր շտաբի պետ Արտակ Դավթյանի հետ:
Թեմայի շուրջ «Առաջին լրատվական»-ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, քաղաքագետ Ռուբեն Մեհրաբյանը և «Քաղաքացիական պայմանագիր» կուսակցության հանրային կապերի պատասխանատու Վահագն Ալեքսանյանը:
«Չափազանց մեծ ուշադրություն պետք է դարձնել մեր Զինված ուժերին»,-նշեց Ազատ Արշակյանը՝ հիշեցնելով վարչապետի այն միտքը, որ ՀՀ ԶՈւ-ն ապահովում է ոչ միայն Հայաստանի անվտանգությունը, այլ նաև կարևորագույն գործոն է տարածաշրջանի կայունության և անվտանգության համար:
«Մենք պետք է մեր բանակն ազատագրենք ճորտատիրությունից, մեր զինվորականները կալանավորներ չեն, ոչ էլ ճորտեր: Մեր բանակը պետք է լինի ժամանակակից»,- նշեց Ա. Արշակյանը՝ հավելելով նաև, որ բանակում ոչ ֆորմալ օրենքեր չպետք է լինեն, նաև բարեվարքության կանոնները պետք է այլ լինեն:
Անդրադառնալով օրերս բանակի բարձրաստիճան մի քանի զինվորականների պաշտոնանկություններին՝ Ռուբեն Մեհրաբյանը նշեց. «Հեղափոխությամբ նոր ղեկավարություն եկավ բանակ, փոխվեցին մոտեցումները և դրանց ամենաերևացող մասն էր պարենային ապահովման կարգի փոփոխությունը, որը ապասովետականացվեց, ապառուսականացվեց, բերվեց ժամանակակից ստանդարտների, և դա չէր կարող խիստ դրական արձագանքների չարժանանալ: Կարծում եմ՝ հենց այս տրամաբանությամբ բանակային կանոնագրքի փիլիսոփայության փոփոխություն պետք է տեղի ունենա: Եվ այն խորհրդային, ռուսական մնացուկները, որ կան բանակում, պետք է լիկվիդացվեն»:
Քաղաքագետը նաև ընդգծեց, որ առկա է բանակի հրամանատարական կազմի լուրջ վերապատրաստման խնդիր, և դեռևս կայացած չէ բանակային հոգեբանների ինստիտուտը: «Հայկական բանակը պետք է արդիականացվի. ռեսուրսներն առկա են հայկական բանակում և ՀՀ-ում, և այդ ուղղությամբ կա նաև քաղաքական կամք»,- նշեց Ռ. Մեհրաբյանը:
Վահագն Ալեքսանյանի դիտարկմամբ՝ ամեն ինչ գալիս է կարգապահությունից. «Սերժանտները պետք է զինվորների շրջանում ունենան հեղինակություն և բարձրացնեն կարգապահության մակարդակը: Սերժանտի համար հեղինակություն պիտի լինի սպան, սպայի համար իր վերադասը… Այս շղթայի վրա աշխատելու դեռ շատ տեղեր կան: Բանակում առկա քրեական մշակույթն էլ ունի իր հիերարխիան… Պետք է հասնենք նրան, որ զինվորների շրջանում հեղինակություն լինի նա, ով ավելի լավ է կատարում հրամանը, իր պարտավորությունները:
Քննարկման մասնակիցների դիտարկմամբ՝ բանկում պետք է «եղբայրություն լինի, ոչ թե ախպերություն»:
Մանրամասն՝ տեսանյութում: