ՌԴ մի քանի գրախանութներ որոշել են գործադուլ անել ի պաշտպանություն «Ցանցեր» գործի ֆիգուրանտների: Այս մասին հաղորդում է Ինտերֆաքսը:
Երկուշաբթի՝ փետրվարի 17-ին մի քանի գրախանութներ ի նշան բողոքի գործադուլ են արել, իսկ մի քանի աշխատակիցներ էլ խոստացել են, որ կսկսեն անհատական բողոքի ակցիաներ կազմակերպել ի պաշտպանություն այդ գործով դատապարտվածների:
Նշվում է, որ իրենց բողոքն են հայտնել Մոսկվայում, Պետերբուգում, Տուլայում եւ Կրասնոյարսկում գործող մի քանի գրախանութներ:
Ըստ գրախանութների տարածած հայտարարության, նրանք որոշել են գործադուլ անել, քանի որ չեն կարող լռել եւ նրանց համար միեւնույն չէ երկրի եւ մշակույթի ճակատագիրը:
«Հույս ունեմ, որ մեր ընկերները եւ հաճախորդները մեզ կներեն պատճառած անհարմարությունների համար, բայց այլ կերպ մենք չենք կարող»,- նշել են գրախանութները:
Պրիվոլժսկի շրջանային զինվորական դատարանը փետրվարի 10-ին վճիռ էր կայացրել «Ցանցեր» գործով անցնող 7 անդամների նկատմամբ: Երիտասարդները մեղադրվում են նախագահական ընտրությունների եւ ֆուտբոլի աշխարհի առաջնության ժամանակ ահաբեկչական գործողություններ ծրագրելու մեջ: Մեղադրյալները դատապարտվել են 6-18 տարվա ազատազրկման: Նրանց խոսքերով, մեղադրյալները ցուցմունք են տվել ճնշումների տակ, իսկ դատական գործընթացն ուղեկցվել է օրենքի կոպիտ խախտումներով:
