«Սրանք մեր իրականության ամենատխուր դեպքերն են, որ վերջին շրջանում անհասկանալիորեն բավականին շատացել են. ես չգիտեմ, թե ինչու են հատկապես հիմա շատացել այդ դեպքերը: Մի բան հաստատ է՝ այդ բոլոր ինքնասպանությունները ըստ էության սպանություններ են, որովհետև ինքնասպանվում են պատանիներ, և նրանք այդ քայլին կարող էին դիմել միայն այն դեպքում, երբ նրանց հասցնեին ինքնասպանության: Այսինքն՝ այդ զորաամսերում ստեղծվում են այնպիսի պայմաններ, երբ երիտասարդը այլ ելք չի գտնում՝ բացի իր վրա կրակելուց»,- «Առաջին լրատվական»-ի հետ զրույցում նշեց իրավապաշտպան Վարդան Հարությունյանը՝ անդրադառնալով բանակում տեղի ունեցած ինքնասպանությունների դեպքերին:
Նրա խոսքով՝ ոչ կանոնադրային հարաբերությունները միշտ էլ բանակներում ստեղծել են այդպիսի իրավիճակ. «Մեր բանակը կառուցված է ռուսական, այնուհետև՝ խորհրդային բանակի նախատիպով, և այնտեղից մեր ժառանգել ենք բոլոր այն արատավոր երևույթները, որ եղել են ռուսական և խորհրդային բանակներում»:
Մեր զրուցակցի կարծիքով՝ 1995-96 թվականներին, երբ արդեն կնքվել էր զինադադարը, անհրաժեշտ էր փոխել մեր բանակի ընդհանուր կառուցվածքը. «Օրինակ՝ ես կարծում եմ, որ պետք է զորակոչային տարիքը բարձրացվի. բանակ պետք է զորակոչվի ոչ թե 18 տարեկան պատանին, այլ 21 տարեկան հասուն տղամարդը: Կարծում եմ նաև, որ պետք է հնարավորություն ստեղծվի, որպեսզի բանակում ծառայող զինվորներն ավարտեն իրենց ուսումը բուհերում և արդեն կազմակերպված, կրթված, այլ աշխարհընկալում ունեցած վիճակում հայտնվեն բանակային միջավայրում: Այսինքն՝ փոքր-փոքր, բայց հաստատուն քայլերով Հայաստանի բանակը պետք է կտրվեր այն արատավոր երևույթներից, որոնք գուցե ստիպված ենք մենք ժառանգել»:
Հարցազրույցն ամբողջությամբ՝ տեսանյութում:
