Այսօր պաշտոնապես մեկնարկում է Սահմանադրական փոփոխությունների հանրաքվեի քարոզարշավը: «Այո»-ի շտաբը գլխավորում է «Իմ քայլը» դաշինքը, սակայն «Ոչ»-ի շտաբ որևէ քաղաքական ուժ այդպես էլ չձևավորեց: Թեմայի շուրջ զրուցելու համար «Առաջին լրատվական»-ը հյուրընկալել է քաղաքագետներ Ռոբերտ Ղևոնդյանին և Արմեն Հովհաննիսյանին:
Պատասխանելով հարցին, թե քաղաքական ուժերն ինչու որոշեցին խուսափել «Ոչ»-ի պատասխանատվությունը վերցնելուց, Արմեն Հովհաննիսյանն ասաց. «Նման դեպքում քաղաքական ուժն իր վրա է վերցնում հետևանքները, նաև՝ հանրաքվեի արդյունքներն ամփոփելուց հետո: Այս դեպքում քաղաքական ուժն իր վրա է վերցնում «Ոչ»-ի պարտությունը և քաղաքական այդ էպիզոդում համարվում է պարտված կողմ»:
Նրա խոսքով՝ մեր քաղաքական ուժերը վերջին ընտրությունից հետո մի տեսակ նոգդաունի մեջ են «Իմ քայլի» ցուցաբերած արդյունքներից. «Ուստի նրանց համար մեկ այդպիսի հարված ստանալը կարող է իսկապես արդեն ճակատագրական լինել»:
Իսկ թե ինչու խորհրդարանական քաղաքական ուժերը չմիացան «Այո»-ին՝ Արմեն Հովհաննիսյանն այսպես բացատրեց. «Հաղթանակի դեպքում, այն էլ ջախջախիչ հաղթանակի դեպքում, «Իմ քայլը» չի դիտարկվում որպես քաղաքական ուժ, որը այդ հաղթանակի արդյունքները և դրական հետևանքները պատրաստ կլինի ինչ-որ մեկի հետ կիսել: Իսկ ի՞նչ իմաստ կա մասնակցել մի գործընթացի, որից դիվիդենդներ ուղղակի չես ստանալու, մինչդեռ քեզ վրա վերցնում ես հակադիր ուժերի հարվածը: Քաղաքական ուժերը ցույց տվեցին հաշվենկատ դիրքորոշում»:
Ռոբերտ Ղևոնդյանն էլ կարծում է, որ խորհրդարանական ուժերը՝ «Բարգավաճ Հայաստանն» ու «Լուսավոր Հայաստանը», նույնիսկ «Ոչ» չքարոզելով՝ այնուամենայնիվ, հասարակության մեջ իրենց ռեյտինգի անկում կգրանցեն. «Նրանց հայտարարած բոյկոտը նրանց դասում է մեկ շարքում այն ուժերի հետ, որոնք մերժվել են հասարակության կողմից՝ ՀՀԿ-ի և ՀՅԴ-ի: Եթե նրանք ավելի շուտ հայտարարեին բոյկոտի մասին, գուցե էֆեկտն այսքան վատ չլիներ»:
Հարցազրույցն ամբողջությամբ՝ տեսանյութում: