Կա տեսակետ, ըստ որի՝ բանակցային գործընթացում քննարկվում է Արցախի ներգրավման հարցը, սակայն լոկ որպես Ղարաբաղի ընտրյալ ներկայացուցիչ։ Ընդ որում, Բաքուն, որպես հակակշիռ, դեմ է տալիս Ղարաբաղի ադրբեջանական համայնքին։ ԱԺ «Իմ քայլը» խմբակցության պատգամավոր Միքայել Զոլյանից «Առաջին լրատվական»-ը հետաքրքրվեց՝ արդյոք մտահոգիչ չէ՞, որ ԵԱՀԿ Մինսկի խմբի համանախագահող երկրների դեսպանները հանդիպում են Ղարաբաղի ադրբեջանական համայնքի ղեկավարի հետ։ Ո՞րը պետք է լինի մեր արձագանքը՝ կանխելու համար այդ համայնքը գործոն դարձնելու ջանքերը։
Պատգամավորի խոսքով՝ միանգամայն ակնհայտ էր, որ Ադրբեջանը հեշտորեն չէր համաձայնելու, որ Արցախը վերադառնա բանակցային գործընթաց, միաժամանակ պարզ էր, որ Ադրբեջանը չունի որևէ տրամաբանական փաստարկ, որը կարելի էր հակադրել հայկական կողմերի դիրքորոշմանը:
«Պարզ տրամաբանությունը հուշում է, որ առանց Արցախի պաշտոնական ներկայացուցիչների հնարավոր չէ կարգավորել հակամարտությունը։ Առավել ևս, որ մինչև 1990-ականների վերջը բանակցային գործընթացը եռակողմ է եղել։ Եվ ահա քանի որ այս հարցում Ադրբեջանը չունի որևէ տրամաբանական փաստարկ՝ Արցախի մասնակցությունը բացառելու, նրանք փորձում են առաջ տանել Արցախի «ադրբեջանական համայնքի» գաղափարը։ Ահա դրա հետ է կապված այն, որ վերջերս ակտիվացել է այս թեման։ Սակայն այստեղ ևս Ադրբեջանի դիրքորոշումը, մեղմ ասած, անտրամաբանական է։ Եթե այդ «համայնքի» անդամներն Ադրբեջանի քաղաքացիներ են, ապա նրանք արդեն ներկայացված են բանակցային գործընթացում, քանի որ Ադրբեջանի իշխանությունները նաև նրանց անունից են բանակցում։ Սա ևս շատ պարզ ճշմարտություն է, և համոզված եմ, որ վաղ թե ուշ սա ընդունվելու է»,- նշեց պատգամավորը՝ հավելելով, որ մնացած ամեն ինչն ընդամենը, լավագույն դեպքում, տեղեկատվական աղմուկ է կամ որոշ դեպքերում՝ տեղեկատվական պատերազմի արտահայտություն։
«Դեսպանները կամ ԵԱՀԿ պաշտոնյաները կարող են ում հետ ասես՝ հանդիպել։ Երբ ես անկախ վերլուծաբան էի, մասնակցել եմ բազմաթիվ հանդիպումների համանախագահների, համանախագահող երկրների դեսպանների կամ ԵԱՀԿ այլ պաշտոնյաների և քաղաքացիական հասարակության ներկայացուցիչների, փորձագետների, լրագրողների հետ և այլն։ Նման հանդիպումներ միշտ տեղի են ունենում, և դրանք չեն կարող որևէ ազդեցություն ունենալ բանակցային գործընթացի վրա։ Այնպես որ՝ պետք չէ շատ կարևորություն տալ ինչ-որ չճշտված լուրերի, թե ով ում հետ է հանդիպել։
Մեր դիրքորոշումները հայտնի են, իսկ մեր դիրքերը խաղաղության գործընթացում ամուր են, այնպես որ՝ անհանգստանալու որևէ առիթ չեմ տեսնում։ Բայց, իհարկե, մենք պետք է ուշադիր լինենք և չեզոքացնենք ադրբեջանական կողմի ցանկացած սադրանք, այդ թվում նաև՝ տեղեկատվական ոլորտում»,- ասաց պատգամավորը։