Չնայած օրեր առաջ «Սասնա ծռեր» կուսակցությունը ժողով էր հրավիրել, որպեսզի որոշեն, թե ինչպես են մասնակցելու ապրիլի 5-ին կայանալիք սահմանադրական փոփոխությունների հանրաքվեին, սակայն դեռևս որոշում չեն կայացրել։
Կուսակցության քարտուղարության անդամ Վարուժան Ավետիսյանին զրույցի սկզբում նախ հիշեցրինք, որ իրենք ամիսներ առաջ հայտարարել էին, որ այսուհետ անվերապահ չեն աջակցելու Նիկոլ Փաշինյանին և նրա կառավարությանը, ո՞րն է լինելու այդ դեպքում իրենց դիրքորոշումը։
«Մեր հայտարարության մեջ հստակ նշված է, թե մենք ինչ ենք ձգտելու անելու։ Խոսքը վերաբերում էր ազգային համաձայնության անցումային կառավարության ձևավորմանը, որը պետք է ունենա հստակ անցումային ծրագիր և դրանով, պայմանական ասած՝ ռեստարտ անի հեղափոխությունը, այն հասցնի ավարտին։ Հայաստանը չպետք է ընկնի պերմանենտ հեղաշրջումների արատավոր ցիկլի մեջ, այլ զարգացման ուղի ընտրի»,- ասաց Վարուժան Ավետիսյանը։
Ինչ վերաբերում է հանրաքվեի վերաբերյալ դիրքորոշմանը, ապա Ավետիսյանը նկատում է, որ խոսքը միայն «այո»-ին կամ «ոչ»-ին պատասխանելուն չի վերաբերում, այլ՝ այն պետք է ունենա քաղաքական բովանդակություն, որի մասին էլ կուսակցության մոտեցումներն է ներկայացրել Շուշիի առանձնակի գումարտակի հրամանատար Ժիրայր Սեֆիլյանն՝ իր վերջին հարցազրույցներում։
«Պետք է հաշվարկվի նաև հետոն, այն պետք է իմաստավորվի, հենց այնպես չպետք է լինի «այո» կամ «ոչ»,- նշեց Վարուժան Ավետիսյանը։
Մեր դիտարկմանը, թե իշխանությունները ստիպված են ընտրել հանրաքվեի տարբերակը, քանի որ այլ տարբերակներ՝ վաղաժամ կենսաթոշակի ուղարկել ՍԴ դատավորներին, այլք, չգործեցին, Վարուժան Ավետիսյանն արձագանքեց․ <Այդ ստիպողական վիճակը իշխանությունն ինքն էր ստեղծել։ Սահմանադրական դատարանն առաջին օրից պետք է մաքրվեր։ Հեղափոխություն կա՛մ անում են, կա՛մ չեն անում, ամեն ինչ կիսատ-պռատ վիճակում է։ Ժողովուրդը իշխանությանը տվել է հեղափոխության մանդատ, ոչ թե Սերժ Սարգսյանի կեղծած Սահմանադրության ու օրենքների սրբադասմամբ նեյնիմ-նեյնիմ անելու։ Նման մանդատ ժողովուրդը չի տվել>։
Վարուժան Ավետիսյանը հիշեցրեց, որ իշխանությունը ոչ մեկի հետ չի քննարկել սահմանադրական փոփոխությունների հարցը, քնել-արթնացել, որոշել է։
Թե երբ հանրաքվեի վերաբերյալ վերջնական որոշում կկայացնի «Սասնա ծռերը», Վարուժան Ավետիսյանը պատասխանեց՝ մոտ օրերս։
