Ազգային Ժողովը երկրորդ ընթերցմամբ ընդունեց առողջապահության նախարարության «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքի նախագիծը, որով արգելվում է ծխախոտի և դրա փոխարինիչների օգտագործումը հանրային վայրերում։ Օրենքի որոշ դրույթներ, սակայն, ուժի մեջ առայժմ չեն մտնի, այլ հանրային սննդի օբյեկտներում, օրինակ, ծխելը կարգելվի միայն 2022 թ-ից։
Տնտեսագետ Վահագն Խաչատրյանի գնահատմամբ՝ այս նախագիծը խիստ բացասական ազդեցություն է ունենալու Հայաստանի տնտեսության և բիզնես սեկտորի վրա։ Խաչատրյանի խոսքերով՝ Հայաստանն աղքատ երկիր է ու իրեն չի կարող թույլ տալ կրել այն բացասական հետևանքները, որոնք առաջանալու են օրենքի կիրառության արդյունքում։
«Այսպիսի նախագծի ընդունումը ընդհանրապես տեղին չէր և ես գտնում եմ, որ այսօր մեր երկրում թեկուզ հենց առողջապահության ոլորտում շատ ավելի կարևոր և առաջնային խնդիրներ կան, որոնք հրատապ լուծում են պահանջում, քան այս նախագծի ընդունումն էր։ Այսօրվա կառավարությունը առաջնային նշանակության խնդիրներով պետք է մտահոգված լինի, որոնցից մեկն, օրինակ, Հայաստանի բնակչությանը տրվող գազի սակագինն է․ թող ինձ ներեն, բայց ես, որպես ՀՀ քաղաքացի, չեմ ցանկանում, որ ինձ համար առավել կարևոր և կենսական նշանակության խնդիրները թողած, կառավարությունն ինձ ամեն օր հիշեցնի, որ ես պետք է քնից արթնանամ, հետո լվացվեմ, հետո հաց ուտեմ, ջուր խմեմ, շոր հագնեմ, հետո ծխեմ կամ չծխեմ և այլն և այլն, այլ գործով թող զբաղվեն։
Այն, ինչ վերաբերում է հակածխախոտային այս քարոզչությանը, ապա ես այդ ամենը ընդունում են հենց այս անվան տակ՝ քարոզչություն և շատ հեռու եմ այն մտքից, որ այն միտված է ինձ նման մարդկանց առողջության պահպանմանը, իսկ, տեղեկացնեմ, որ ես անձամբ չծխող մարդ եմ և երբեք չեմ ծխել, բայց չեմ կարծում, որ սա իմ ու իմ նման մյուս քաղաքացիների առողջությունը պահպանելու համար ընդունված նախագիծ է, ուղղակի թող չմտնեն դեմագոգիայի դաշտ ու ցույց տան, թե իրենք ինձանից շատ են մտահոգված իմ առողջությամբ»,- «Առաջին լրատվական»-ի հետ զրույցում շեշտեց տնտեսագետը։
Մանրամասները՝ տեսանյութում։