Քութաիսի Դավիթ Ագմաշենեբելիի անվան միջազգային օդանավակայանը 2019 թվականի արդյունքներով դարձել է երկրորդը Եվրոպայում ըստ ուղևորահոսքի աճի դինամիկայի: Եվրոպայի օդանավակայանների միջազգային խորհրդի (ACI Europe) թարմացված տվյալները ներկայացրել է Քութաիսի օդանավակայանի մամուլի ծառայությունը:
Ըստ ACI Europe-ի դասակարգման՝ օդանավակայանները բաժանվում են 4 խմբի: Առաջին կատեգորիային առնչվում են օդանավակայան-հսկաները, որոնք նախատեսված են տարեկան ավելի քան 25 մլն ուղևորի համար: Երկրորդը՝ 10-25 մլն ուղևորահոսքով, երրորդը՝ 5-10 մլն, իսկ չորրորդը՝ մինչև 5 մլն: Քութաիսի Դավիթ Ագմաշենեբելիի անվան միջազգային օդանավակայանը պատկանում է չորրորդ կատեգորիային: ACI Europe-ի համաձայն՝ 2019թ. այստեղ ուղևորահոսքը կազմել է 41,6%: IV խմբում առաջատարը Հյուսիսային Մակեդոնիայի Օհրիդ օդանավակայանն է (+72,1%):
2018-ի արդյունքներով՝ Քութաիսի օդանավակայանը ACI Europe վարկանիշի առաջատարն էր՝ այդ ժամանակ ուղևորահոսքը կազմել է 52,5%: Այն օդանավակայանների շարքում, որոնցում ուղևորահոսքը գերազանցում է 25 միլիոն մարդը, ամենամեծ ցուցանիշն ունեցել է Վիեննան (+17,1%): Երկրորդ կատեգորիայում (տարեկան 10-25 մլն ուղևոր) գլխավորում է Կիևի «Բորիսպոլ» օդանավակայանը (+21,1%), իսկ երրորդում՝ Կրակովի օդանավակայանը (+24,2%):
Վրաստանի Օդանավակայանների միավորման տեղեկատվությամբ՝ Քութաիսի Դավիթ Ագմաշենեբելիի անվան միջազգային օդանավակայանում 2020թ. հունվարին ուղևորահոսքը աճել է 43%-ով՝ նախորդ տարվա նույն ժամանակամիջոցի համեմատ: Այդպիսով, նախորդ ամիս Քութաիսի օդանավակայանը ընդունել է ավելի քան 79,7 հազար ուղևոր: Ընդհանուր առմամբ 2020թ. հունվարին Վրաստանի օդանավակայանները սպասարկել են ավելի քան 314 հազար ուղևորի, ինչը 3%-ով քիչ է նախորդ տարվա նույն ժամանակամիջոցի համեմատ (ավելի քան 324,5 հազար ուղևոր):