Արցախում նախագահական և խորհրդարանական ընտրությունները տեղի են ունենալու մարտի 31-ին։ Այսօր ԱՀ կենտրոնական ընտրական հանձնաժողով գրանցման փաստաթղթերը ներկայացնելու վերջնաժամկետն է։ Այս պահի դրությամբ Արցախի ԿԸՀ-ն ստացել է Արցախի նախագահի 12 թեկնածուների գրանցման փաստաթղթեր: ԱԺ ընտրություններին մասնակցելու համար ընտրական ցուցակ են ներկայացրել 6 կուսակցություններ` Արցախի Պահպանողական կուսակցությունը`16 թեկնածուների, «Միասնական հայրենիք» կուսակցությունը`62 թեկնածուների, «Ազգային վերածնունդ» կուսակցությունը` 20 թեկնածուների, « Հայ Հեղափոխական Դաշնակցություն» կուսակցությունը` 33 թեկնածուների, Արցախի Ժողովրդավարական Կուսակցությունը` 33 թեկնածուների, Արցախի «Արդարություն» կուսակցությունը` 35 թեկնածուների ընդգրկմամբ: Ընտրական ցուցակ է առաջադրել մեկ կուսակցությունների դաշինք` «Ազատ Հայրենիք-ՔՄԴ » կուսակցությունների դաշինքը` 65 թեկնածուների ընդգրկմամբ:
Շար հետաքրքիր մրցակցություն է սպասվում Արցախում։ Այս մասին «Առաջին լրատվական»-ի հետ զրույցում նշեց Արցախի նախագահի մամուլի խոսնակ, Արցախի նախագահի թեկնածու Դավիթ Բաբայանը՝ հավելելով, որ անկանխատեսելի կարող են լինել այդ ընտրությունների արդյունքները։
«Չեմ բացառում երկրորդ փուլի հավանականությանը, դա ցույց կտա ժամանակը»,-ասաց նա։
Դիտարկմանը, որ շատերը Արցախի նախագահի ընտրություններում ֆավորիտ են համարում Արայիկ Հարությունյանին և Մասիս Մայիլյանին, Դավիթ Բաբայանն ասաց. «Ես չեմ ուզում որևէ մեկին թերագնահատել, կամ գերագնահատել։ Ժամանակն ամեն ինչ ցույց կտա։ Մենք մրցակիցներ են ենք և ամեն մեկը պայքարելու է իր գաղափարների համար։ Ո՞վ գիտի, թե որ թեկնածուն ինչքան քվե ունի Դա ցույց կտան միայն ընտրությունների արդյունքները»։
Արցախի «Միացյալ Հայաստան» կուսակցության նախագահ Վահան Բադասյանը «Առաջին լրատվական»-ի հետ զրույցում նշեց, որ աննախադեպ, նախորդներից տարբերվող ընտրություն է սպասվում․ «Մենք պարզ տեսնում ենք, որ ժողովուրդը ուզում է փոփոխություն։ Ճիշտ է, իշխանությունն ամեն ինչ արել է, որ իր երկու թեկնածուները՝ Մասիս Մայիլյանը և Արայիկ Հարությունը հաղթեն, բայց ժողովուրդը ուզում է իրական փոփոխություն։ Սամվել Բաբայանը միացել է Մասիս Մայիլյանին։ Այն ժամանակ, երբ մենք Բակո Սահակյանի հրաժարականի պահանջով ստորագրահավաք էինք անում, դիմեցինք նաև Սամվել Բաբայանին, սակայն նա չմիացավ, ասաց, որ պետք է սպասել մինչև 20 թվականը։ Հիմա ինքը միացել է իշխանության իրական թեկնածու Մասիս Մայիլյանին։ Ռոբասերժական իշխանություններն արդեն Արայիկ Հարությունյանին չեն սատարում, նրանց մի մասը սատարում է Արայիկ Հարությունյանին, մյուս մասը՝ Մասիս Մայիլյանին, նրանց մի մասը չի սատարում Արայիկ Հարությունյանին, քանի որ կարծում է՝ դավաճանել է իրենց և անցել Նիկոլի կողմը»,-ասաց Վահան Բադասյանը՝ հավելելով, որ իրենք գտնում են՝ թե՛ Արայիկ Հարությունյանը, թե՛ Մասիս Մայիլյան իշխանություններ են, ընտրվելու դեպքում շարունակելու են երկրի թալանը, կոռուպցիոն գործընթացները․ «Տեսեք, թե ովքեր են կանգնած նրանց կողքին և ում են սատարում։ Նրանք երկուսն էլ կոռուպցիոն գործողությունների եթե մասնակիցն էլ չեն, ապա իշխանության մաս են եղել և լռել են, երբեք իր կարծիք չեն հայտնել մարդու իրավունքների խախտման, ընդերքի թալանման վերաբերյալ։ Արայիկ Հարությունյան միշտ եղել է իշխանությունների ֆավորիտներից»։
Նրա խոսքով՝ բոլոր նախկին և ներկա իշխանությունները միացել են և փորձելու են ժողովրդին ներկայանալ որպես իշխանություն և փորձելու են միավորել իշխանության և ընդդիմության ձայները․ «Մենք միակ ուժն ենք, որ 93-ից այս կողմ պայքարել ենք անօրինականությունների դեմ, և շարունակելու ենք պայքարը այս երևույթների դեմ։ Մենք պատրաստ ենք առաջնորդելու ժողովրդին»։
Բադասյանը նշեց, որ 2000թվականից մինչև այսօր 145․000-ից 120․000 բնակիչ է մնացել․ «Ո՞ւր են այդ մարդիկ, արտագաղթել են, քանի որ չկա հայրենիքում ապրելու հնարավորություն, ինչպես կարող է հաղթած ժողովուրդը չկարողանա երկրում ապրել։ Հայաստանում տեղի ունեցած փոփոխությունից հետո ժողովուրդն այլևս փոփոխություն է ուզում»։