Այս օրերին, երբ աշխատանքային այցով Գերմանիայում է գտնվում ՀՀ վարչապետ Նիկոլ Փաշինյանը, շատերն են հիշում, որ գրեթե մեկ տարի առաջ էլ նա մեկնել էր Գերմանիա և հանդիպումներ ունեցել երկրի կանցլեր Անգելա Մերկելի հետ։ Մինչ այդ էլ թավշյա հեղափոխությունից հետո Հայաստան էր այցելել Գերմանիայի կանցլեր Անգելա Մերկելը։ Այնպես որ, սա Փաշինյանի և Մերկելի երրորդ հանդիպումն է։
Իր երկրորդ այցի ժամանակ Փաշինյանը Մերկելի հետ ԶԼՄ-ների համար հանդես է եկել հայտարարությամբ, հետո այցելել է «Ֆրիդրիխ Էբերտ» հիմնադրամ, ունեցել մի շարք հանդիպումներ։ Նա ներկայացրել է հետհեղափոխական Հայաստանում ստեղծված իրավիճակն ու ծագած մարտահրավերները։
Վարչապետ Նիկոլ Փաշինյանը փետրվարի 14-ի առավոտյան այցելել է Գերմանիայի առևտրաարդյունաբերական պալատ, որտեղ աշխատանքային նախաճաշի շրջանակում հանդիպում է ունեցել Գերմանիայի տնտեսության և էներգետիկայի դաշնային պետքարտուղար Թոմաս Բարայսի, Գերմանիայի առևտրաարդյունաբերական պալատի գործադիր տնօրեն, արտաքին տնտեսական հարցերով խորհրդի նախագահ Ֆոլքեր Թրայերի և պալատի ներկայացուցիչների հետ:
Թոմաս Բարայսը վստահություն է հայտնել, որ վարչապետի այցը նոր խթան կհանդիսանա երկկողմ բիզնես կապերի ընդլայնման, տնտեսության տարբեր ճյուղերում համատեղ նոր ծրագրերի իրականացման համար:
Մեկ տարի անց ի՞նչ սպասելիքներ կան Հայաստանի վարչապետի և Գերմանիայի կանցլերի հանդիպումներից։
Գերմանիայում «Հայ ակադեմիականների միության» նախագահ Ազատ Օրդուխանյանը կարծում է, որ որքան շատ հանդիպեն երկու երկրների ղեկավարները, այնքան ցանկալի է, և երկու երկրների հարաբերությունների զարգացումը կլինի ինտենսիվ։
«Շատ ուրախալի է, որ այդ հանդիպումները շարունակվում են, քանի որ դրանք հետագա քաղաքական, տնտեսական, մշակութային հարաբերությունների զարգացման հիմքերն են դնում»,- ասաց մեր զրուցակիցը։
Օրդուխանյանն ուշադրություն է հրավիրում, որ զարգանում են կապերը գերմանական գիտական հաստատությունների հետ։
«Գերմանական գիտական ներուժից սնվելը մեզ համար անհրաժեշտություն է։ Այն թթվածին է մեր գիտության և տնտեսության համար, քանի որ այդ գիտական հաստատությունները շատ սերտ աշխատում են տնտեսության հետ։ Եվ այդ գիտական հաստատություններ-տնտեսական տարբեր ճյուղեր կապի մոդելի միջոցով են գերմանացիները կարողացել զարգացնել իրենց տնտեսությունը, ինչն ընդօրինակելը չափազանց օգտակար կլինի մեր փոշիացված տնտեսության համար։ Տիկին Մերկելը բազմիցս շեշտեց, որ գերմանական կողմը պատրաստ է աջակցել և նպաստելու է տնտեսական և գիտական երկկողմանի զարգացումներին»,- նշեց Ազատ Օրդուխանյանը։
Ինչ վերաբերում է Նիկոլ Փաշինյանին, ապա Օրդուխանյանը կարևորում է, որ նա իրեն նվաստացած չի պահում արտերկրում, անամոթաբար հայտարարություն չի անում, թե մենք Ադրբեջանի դեմ կռվում ենք 80-ականների զենքով, ինչպես 2016թ․ Ապրիլյան պատերազմից հետո Սերժ Սարգսյանն էր հայտարարել։ Միաժամանակ նա կարծում է, որ դեռևս վաղ է արդյունքների մասին հայտարարելը։