Երեկ ԲՀԿ-ն որոշում կայացրեց չմասնակցել սահմանադրական հանրաքվեի գործընթացին։ Քաղաքագետ Ռոբերտ Ղևոնդյանը, անդրադառնալով ԲՀԿ-ի որոշմանը, նշեց, որ ինքն ավելի շատ սպասում էր, որ ԲՀԿ-ն որոշակի նախապայմանով մասնակցի «այո»-ի քարոզարշավին, քան «ոչ»-ի. «Այնուամենայնիվ, այս տարբերակն էլ անակնկալ չէր, քանի որ ԲՀԿ-ն փորձում է խորհրդարանում ընդդիմադիր դիրքերից հանդես գալ, և այս գործընթացում, որտեղ իրենց ընդդիմադիր համարող բոլոր ուժերը փորձում են անտեսել հանրաքվեն՝ ՀՀԿ, ՀՅԴ, ԼՀԿ, հասարակության արձագանքի առումով բոլոր այդ ուժերը դիրքավորվում են որոշակի ճամբարում, որը ասոցացվում է նախկինների հետ։ Այսինքն՝ ԲՀԿ-ն իր այս քայլով իր այս քայլով հասարակության աչքին ինքն իրեն ասոցացրեց նախկինների հետ, ինչը բնականաբար, ռեյտինգի առումով բացասական նշանակություն կունենա ԲՀԿ-ի վրա»,-ասաց քաղաքագետը՝ հավելելով, որ հավանաբար որպես կուսակցություն ԲՀԿ-ի այլ շահերը դա են պահանջել։
Դիտարկմանը, որ եթե ԲՀԿ-ն դիրքավորվեր հստակ «ոչ»-ի ճամբարում, կկորցներ իր վարկանիշը, Ռոբերտ Ղևոնդյանն ասաց. «Այստեղ մենք պետք է հաշվի առնենք, թե կոնկրետ ինչպես են դիրքավորվում այն ուժերը, որոնք ասոցացվում են նախկինների հետ։ Եթե ԲՀԿ-ն հստակ դիրքորոշում արտահայտեր, ապա նա կդիրքավորվեր ոչ թե ՀՀԿ-ի ու ՀՅԴ-ի հետ, այլ կդիրքավորվեր որպես առանձին «ոչ»-ի ճամբար, քանի որ ՀՀԿ-ականները, ՀՅԴ-ականները, «Լուսավոր Հայաստանը» նույնպես «ոչ» չեն քարոզում։ Նրանք ասել են այն, ինչ ասաց ԲՀԿ-ն։ Այսինքն այս ուժերի մոտեցումը տարբերվում է հստակ «ոչ»-ից։ Հստակ «ոչ» քարոզում են միայն իրավապաշտպանների խումբը, որոնք նույնպես ասոցացվում են նախկինների հետ հասարակության աչքում, սակայն իրենցից չեն ներկայացնում կազմակերպված, համակարգային որոշակի գործունեություն իրականացնող մարմիններ կամ քաղաքական դաշտում հստակ կողմնորոշում ունեցողներ»։
Այսինքն, ըստ նրա, մենք ունենք մի իրավիճակ, երբ իշխանությունն ունի երկու ընդդիմադիր հատված. Մեկը կառուցվածքային հնարավորություններ ունեցող հատվածն է, որը ասոցացվում է նախկինների հետ և դիրքավորվում է հանրաքվեն անտեսելու օրակարգով, մյուսը այն հատվածն է, որ հստակ «ոչ»-ի դիրքերից է հանդես գալիս. «Այս երկրորդ հատվածը չունի կառուցվածքային հիմքեր, այն միայն մարդկանց խումբ է։ ԲՀԿ-ն, ըստ էության, ինքն իրեն դասեց այն խմբի շարքում, որը հասարակության աչքին ասոցացվում է նախկինների հետ։ Թե այլ ուժեր ինչպիսի դիրքավորում կունենան, ինչ դիրքերից հանդես կգան, հենց դա էլ կձևավորի քաղաքական լանդշաֆտը՝ հանրաքվեի տրամաբանությունից ելնելով»։
Հարցին, թե սպասելի՞ էր, որ ԲՀԿ-ի կողմից նման արձագանք կլինի՝ հաշվի առնելով իրենց լոյալությունը շատ հարցերի նկատմամբ, քաղաքագետն արձագանքեց. «Լսելով ԲՀԿ-ականների հայտարարությունները, ես առավելապես սպասում էի որոշակի նախադրյալներով «այո»-ին միանալու օրակարգը, սակայն չէի բացառում նաև ԲՀԿ-ի կողմից այսպիսի մոտեցումը, որը տեսանք։ Իհարկե, սպասելի էր, իհարկե, հասկանալի է, որ այն ուժը, որը փորձում է ընդդիմադիր դիրքերից հանդես գալ իշխանության նկատմամբ, կարող է միանալ առավելապես ավելի ընդգրկուն ընդդիմադիր հատվածին և փորձել այդպիսով ազդեցություն գործել իշխանության վրա՝ սեփական ընդդիմադիր դիրքերը չկորցնելու համար»։
Լուսանկարը՝ Armeniasputnik-ի
