Ինչպես գրում է ռուսական Коммерсант-ը, Ռուսաստանի նախագահ Դմիտրի Մեդվեդևը իր գերմանացի գործընկեր Անգելա Մերկելի հետ բանակցությունների ժամանակ բարձրացնելու է Ռուսաստանից Գերմանիա գազ մատակարարող «Հյուսիսային հոսքի» երրորդ գազամուղը կառուցելու հարցը: Այս առաջարկը պայմանավորված է այն հանգամանքով, որ Ռուսաստանը կարող է որոշում ընդունել առժամանակ դադարեցնելու «Հարավային հոսք» նախագծի իրականացումը, քանի որ Թուրքիայի հետ բանակցություններում առաջացել են որոշակի խնդիրներ: Ռուսաստանը մտադիր է Գերմանիայի օգնությամբ ավելացնել արտահանման իր հզորությունները: Коммерсант-ին այս մասին հաղորդել են նրա անանուն աղբյուրները:
Աղբյուրն ասել է, որ մանրամասները դեռ չեն քննարկվել, սակայն կարևոր է իմանալ գերմանացիների կարծիքը: Նշվում է, որ Ռուսաստանը ցանկանում է օգտվել Եվրոպայում ատոմային էներգետիկայի հզորությունների կրճատման հանգամանքից և ավելացնել գազի մատակարարումն այդ երկրներ: Իսկ «Հյուսիսային հոսքի» հզորությունների մեծացումը մյուս կողմից կօգներ կոմպենսացնել «Հարավային հոսքի» շինարարության հապաղումը: Թուրքիան իր տարածքային ջրերով գազամուղն անցկացելու թույլտվություն դեռ չի տվել:
«Թուրքերի համար այս նախագիծը տնտեսական հետաքրքրություն չի ներկայացնում, քանի որ նրանք նույնիսկ չեն վերցնում այն ծավալը, որը կարող են ստանալ «Երկնագույն հոսքով»: Տրանզիտային եկամուտները նույնպես կարևոր չեն Թուրքիայի համար: Նրանց համար առավել կարևոր է աշխարհաքաղաքականությունը և Եվրոպայի համար խոշոր գազային տարանցիկ կենտրոն դառնալու հնարավորությունը: Այդ պատճառով նրանք կարող են մեզ հետ դեռ շատ երկար սակարկել շահեկան պայմաններ ստանալու ակնկալիքով»,- թերթին ասել են ՌԴ արտգործնախարարությունում:
Թերթի փորձագետներն ասել են, որ գերմանացի պաշտոնյաները թերահավատորեն են տրամադրված «Հյուսիսային հոսքի» հզորությունների մեծացման հանդեպ: Հիշեցնենք նաև, որ «Հյուսիսային հոսքի» հզորությունների վերաբերյալ անցած շաբաթ խոսել էր նաև վարչապետ Վլադիմիր Պուտինը:
