«Առաջին լրատվական»-ի հետ զրույցում անդրադառնալով հարցին, թե իշխանությունը Սահմանադրական դատարանի ճգնաժամը հանգուցալուծելու համար ինչու ընտրեց հանրաքվեի ճանապարհը, իրավագետ, գլխավոր դատախազի նախկին տեղակալ Գագիկ Ջհանգիրյանը նշեց. «Իշխանությունը կարող էր հեղափոխությունից հետո ավելի արագ լուծել այս կնճիռը, բայց որոշեց գնալ այլ ճանապարհով ավելի փափուկ միջոցներով հասնել ՍԴ ճգնաժամի հանգուցալուծմանը… Նախաձեռնությունները հաջողություն չունեցան, և իշխանությունն ի վերջո գնաց Սահմանադրության անցումային դրույթների՝ 213-րդ հոդվածում փոփոխություններ կատարելու ճանապարհով»: Իրավագետի դիտարկմամբ՝ հանրաքվեի ճանապարհով այս խնդրի լուծումը ճիշտ ճանապարհ է, քանի որ փաստացի փոփոխություն է կատարվում դատական իշխանության վերաբերյալ 7-րդ գլխում, իսկ դա Սահմանադրության 203-րդ հոդվածի համաձայն, այն գլուխներից է, որը կարող է փոփոխվել բացառապես հանրաքվեով»:
Գագիկ Ջհանգիրյանի դիտարկմամբ՝ ՀՀ Սահմանադրությունը կաղում է երկու ոտքից: «Սահմանադրությունը դարձրել են դոգմա, որի մեջ հնարավոր չէ փոփոխություն անել, միայն կարելի է մեկնաբանել, և փաստորեն ժողովուրդը, որին պատկանում է իշխանությունը, զրկված է Սահմանադրության մեջ փոփոխություն կատարելու իրավունքից»:
«Գործող Սահմանադրությունը խոտան է, բազմաթիվ խոցելի տեղեր ունի»,- ընդգծեց Գ. Ջհանգիրյանը՝ հույս հայտնելով, որ սահմանադրական բարեփոխումների հանձնաժողովն իր աշխատանքի ընթացքում կանդրադառնա նաև այդ խոցելի խնդիրներին:
Գ. Ջհանգիրյանի խոսքով՝ հանրաքվեն ժողովրդավարական բարձրագույն լուծումներից մեկն է. «Կարծում եմ՝ «Ոչ»-ի կողմնակիցները ազնիվ չեն, եթե դեմ են, ուրեմն թող պայքարեն այս հանրաքվեի անցկացման դեմ: Եթե դեմ են, բայց չեն պայքարում, ուրեմն մի բան այն չէ»:
«Գաղտնիք չէ, որ հայտնի քրեական գործի հետ կապված՝ Սահմանադրական դատարանը դարձել է վերջին հույսն ու հավատը, և որը ինչ-որ իքս պահի պետք է որոշում կայացնի: Կարծում եմ՝ սա է խնդիրը: Եվ շատ լավ հասկանում են, որ այդ հույսը գնալով մշուշոտ է դառնում»,- նշեց մեր զրուցակիցը՝ անդրադառնալով հարցին, թե ինչու է նախկին իշխանության համար այդքան կարևոր ՍԴ-ում իրենց մարդկանց պահելը:
Մանրամասն՝ տեսանյութում: