Արցախի խորհրդարանի ընդդիմադիր «Վերածնունդ» խմբակցության ղեկավար Հայկ Խանումյանը ևս առաջադրվել է Արցախի նախագահական ընտրություններում, որը կայանալու է մարտի 31-ին։ Իր գլխավորած «Ազգային վերածնունդ» կուսակցությունը կմասնակցի նույն օրը կայանալիք խորհրդարանական ընտրություններին՝ սեփական ցուցակով։
«Առաջին լրատվական»-ի հետ զրույցում Խանումյանն ասաց, որ իր առաջադրվելու խոչընդոտները տեխնիկական են եղել. «2020թ. հունվարի 25-ին ԱՀ ոստիկանության Ստեփանակերտի անձնագրային բաժինը հրաժարվել էր ինձ տրամադրել Արցախի Հանրապետության նախագահի թեկնածուի համար անհրաժեշտ տեղեկանքը վերջին 10 տարում ԱՀ քաղաքացի հանդիսանալու մասին՝ մեկնաբանելով, որ իրենց ռեգիստրում իմ քաղաքացիության մասին տվյալները առկա են 2020թ. ապրիլից: Ես Արցախի վարչական դատարանում վիճարկել եմ այս որոշման փաստական հիմքը և պահանջել վերացնել անձնագրային բաժնի վարչական ակտը: ԱՀ օրենսդրությամբ՝ մինչև 50 տարեկան արական սեռի անձանց քաղաքացիությունը ծագում է զինվորական հաշվառման պահից, ԱՀ զինապարտության մասին օրենքի համաձայն՝ ԱՀ զինկոմիսարիատում կարող է հաշվառվել միայն Արցախի քաղաքացին: Իսկ իմ հաշվառումը զինկոմիսարիատում տեղի է ունեցել 2010թ. մարտի 26-ին: Դատարանը, հաշվի առնելով այս փաստերը, առ ոչինչ ճանաչեց անձնագրայինի ակտը և պարտավորեցրեց ոստիկանության բաժնին ինձ տրամադրել համապատասխան տեղեկանքը»։
Խանումյանը միևնույն ժամանակ ընդգծեց. «Արցախում այժմ ակտիվ զարգացումներ են, բոլոր ուժերն աշխատում են։ Մենք զբաղված ենք նախընտրական արշավի պատրաստմամբ։ Մենք անպայման բոլոր տեղերում՝ շրջաններում, քաղաքներում, հանդիպումներ ենք ունենալու։ Օրական մոտ 10 հանդիպում»։
Հարցին, թե ի՞նչ կարծիք ունի Սամվել Բաբայանի՝ Մասիս Մայիլյանին սատարելու որոշման մասին, Խանումյանն արձագանքեց. «Մենք մեր հստակ գիծն ունենք, ուրիշների անելիքները քիչ են հետաքրքրում։ Դեռ մեկ տարի առաջ որոշել ենք, որ սեփական ցուցակով ու թեկնածուով ենք մասնակցելու ընտրություններին։ Գնում ենք մեր գծով, ժողովրդին առաջարկելու ենք մեր ծրագիրը»։
Դիտարկմանը, թե ինքը երկրորդ փուլի է ձգտում, ու շատերի դիտարկմամբ՝ այս դաշինքը հենց երկրորդ փուլ գնալու նպատակ ունի, մեր զրուցակիցն արձագանքեց. «Մենք աշխատելու ենք, որպեսզի երկրորդ փուլում լինենք, ժամանակը ցույց կտա։ Ես չգիտեմ, թե այդ դաշինքն ինչ ձևով կազդի երկու թիմերի թիմակիցների որոշումների վրա։ Տարբեր կարծիքներ կան, մենք էլ աշխատում ենք։ Ամեն օր իրավիճակ է փոխվում, ու կարծում եմ՝ հիմնական որոշողը քարոզարշավն է լինելու, ավելի շուտ՝ քարոզարշավը շատ բան է որոշելու»։
Մամուլում պարբերաբար հրապարակումներ են հայտնվում, որ թեկնածուներից ոմանք ինքնաբացարկ են հայտնելու, մեկ-երկու թեկնածուի շուրջ համախմբվելու կոչեր են լինելու։ Այս տեղեկություններին ի պատասխան՝ Խանումյանն արձագանքեց. «Ես չգիտեմ, մեր պարագայում դա բացառվում է։ Մենք գնալու ենք մինչև վերջ, ուրիշների հետ կապված որևէ բան չեմ կարող ասել»։
Արդյոք ՀՀ նախկին իշխանությունները, հակահեղափոխական ուժերը կփորձե՞ն Արցախում իրավիճակ սրել՝ հարցին ի պատասխան մեր զրուցակիցն ասաց. «Չեմ կարող կանխագուշակություններ անել։Կարծում եմ՝ բոլորն իրենց քարոզարշավով են զբաղված լինելու, ամեն մեկն իր ոճով։ Տեսնենք՝ ինչ կստացվի»։
