Սահմանադրական դատարանում ստեղծված ճգնաժամը հանգուցալուծելուն ուղղված ապրիլի 5-ին կայանալիք սահմանադրական փոփոխությունների հանրաքվեն արտախորհրդարանական ուժերի համար առիթ է դարձել, որպեսզի հավաքներ, ժողովներ հրավիրեն և իրենց տեսակետները ներկայացնեն այնտեղ, որոշեն՝ «Այո»-ի՞ ճամբարին են միանալու, թե՞ «Ոչ»-ի։ Ոմանք՝ նախկինում ՀՀ վարչապետ Նիկոլ Փաշինյանի հետ ընդդիմադիր պայքար մղած ՀԱԿ-ը և «Հանրապետություն» կուսակցությունը, հանդես են եկել հայտարարություններով, որ իրենք «Այո» են ասելու հանրաքվեին, ՀՅԴ-ն կոչ է արել անտեսել հանրաքվեն։
Միավորված աշխատանքային կուսակցության նախագահ, ԱԺ նախկին պատգամավոր Գուրգեն Արսենյանից, որն, ի դեպ, պարբերաբար հանդես է եկել թավշյա իշխանությանն ու նրա արդյունքում ձևավորված կառավարությանն աջակցելով, հետաքրքրվեցինք, թե կողմնակի՞ց են հանրաքվեին։
Գուրգեն Արսենյանը խոստացավ, որ այդ հարցին կպատասխանի ավելի ուշ։
«Իմ դիրքորոշումը կարող եմ հայտնել ավելի ուշ, հենց «Առաջին լրատվական»-ի տաղավարում»,- արձագանքեց նա։
«Սասնա ծռեր» համահայկական կուսակցության քարտուղարության անդամ Վարուժան Ավետիսյանն էլ նշեց, որ իրենք այդ պահին ժողով են հրավիրել հանրաքվեի վերաբերյալ, որոշում կընդունեն, որի մասին կիրազեկեն ավելի ուշ։
«Երկար չենք սպասեցնի, մեր պաշտոնական տեսակետը կներկայացնենք»,- ասաց մեր զրուցակիցը։
Հետաքրքրվեցինք, թե ակտիվ քարոզարշա՞վ են անցկացնելու, շտաբնե՞ր են ձևավորելու։
«Երբ մեր սկզբունքային դիրքորոշումը ճշտենք, այն ժամանակ էլ կորոշենք, թե ինչպես ենք մասնակցելու հանրաքվեին»,- նշեց Ավետիսյանը։