Լուրեր
Հանրաքվեն այսուհետ ՀՀ պատմության մեջ դառնալու է կարևոր հարցերի համար հաճախ օգտագործվող գործիք

Սահմանադրական դատարանի հարցի վերաբերյալ հանրաքվեի գործընթացում հետաքրքիր իրավիճակ է «Ոչ»-ի առայժմ այսպես ասած թեական ճամբարում, քանի որ ոչ ասողների պակաս կարծես թե բոլորովին չկա, սակայն չկա նաև ձևավորված «ճամբար»: Ավելին, թեև հանրաքվեի գաղափարն ու դատարանակազմի փոփոխությունը մերժող շրջանակները բավականին աշխուժորեն ձեռնամուխ են եղել իրենց մոտեցումների քարոզչությանը և փաստորեն իշխանության նախաձեռնության դեմ հակաքարոզչությանը, այդուհանդերձ նրանցից որևէ մեկը չի շտապում դրա համար ստանձնել ֆորմալ պատասխանատվություն:

Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Միքայել Զոլյանը, վերլուծաբան Գոռ Մադոյանը և «Քաղաքացու որոշում» կուսակցության գործադիր մարմնի անդամ Գոռ Հակոբյանը:

Միքայել Զոլյանի խոսքով՝ եթե ՍԴ խնդիրը չլուծվի, այն դառնալու է ական, որը կարող է ցանկացած պահի պայթել: «ՍԴ ճգնաժամը լուծելու համար մի քանի տարբերակ էր քննարկվում և ի վերջո ընտրվեց հանրաքվեի տարբերակը. «Նախկին իշխանությունը և նրա հետ կապված խմբավորումները միշտ մեզ փորձում են հանրային բաց քաղաքական դաշտից դեպի ինտրիգների, «ռազբորկաների» դաշտ տեղափոխել, որտեղ իրենք ուժեղ են, քանի որ ամբողջ կյանքում դրանով են զբաղվել: Մենք որոշեցինք այդ գործընթացը տանել բաց հանրային քաղաքականության դաշտ և ժողովրդին հնարավորություն տալ իր խոսքն ասելու: Ժողովրդի կարծիքը հարցնելն այս հարցի լուծման ամենաճիշտ ճանապարհն է: Հանրաքվեի պրակտիկան պետք է մեզ համար դառնա սովորական երևույթ այն հարցերի լուծման համար, որոնք շատ կարևոր են և ունեն սահմանադրական նշանակություն. կարծում եմ, հանրաքվեները սրանից հետո Հայաստանի պատմության մեջ դառնալու են ամենահաճախ օգտագործվող գործիքը»,- նշեց պատգամավորը:

Գոռ Մադոյանի դիտարկմամբ՝ թեև հանրաքվեն մի փոքր ուշացած է, բայց շատ կարևոր է, որ հեղափոխության արժեքներն են շարունակվում, և հասարակության խնդիրը լուծելու համար հասարակությունն ինքն է որոշում կայացնելու… «Իսկ նախկին իշխանությունների գործելաոճի տրամաբանությամբ ժողովուրդն իրենց ընդհանրապես պետք չէր, իրենք ունեին տարբեր լծակներ, որոնք աշխատեցնում էին»,- նկատեց վերլուծաբանը:

Գոռ Հակոբյանի խոսքով՝ ողջունելի է, որ ժողովրդավարության մեխանիզմներն են օգտագործվում հանրային քաղաքական հարցեր լուծելու կամ որոշում կայացնելու համար. «Հանրաքվեն լավագույն միջոցներից է ՍԴ հարցին լուծում տալու համար»:

Գոռ Մադոյանի դիտարկմամբ՝ խորհրդարանական ընդդիմությունը հեղափոխական տրամաբանության մեջ չէ: «Բոլորը հասկանում են որ «Ոչ»-ի ճամբարը պարտված է և չեն պատրաստվում «Ոչ»-ի ճամբարի դրոշակակիրը դառնալ, որովհետև դա ենթադրում է պատասխանատվություն թե՛ ընթացքում, թե՛ դրանից հետո»,- նշեց վերլուծաբանը:

Մանրամասն՝ տեսանյութում:

  • Դիտումներ՝ *