Բրիտանական Jones & Jacob աճուրդային տունը վաճառքի է հանել գերմանական Ռայխի ֆյուրեր Ադոլֆ Հիտլերի թիկնապահներից մեկի լուսանկարչական ալբոմը: Լուսանկարները, որոնք վաճառողների պնդմամբ մինչ այժմ անհայտ են եղել, հրապարակել է Daily Mail-ը:
Ալբոմն ուղարկվել է անանուն հաճախորդի կողմից, որը հաղորդել է, որ այն գտել է հանգուցյալ հորեղբոր պահարանում։ Հորեղբայրը պատերազմից հետո հավաքածուն Գերմանիայից է բերել Բրիտանիա:
Ալբոմը բաղկացած է 170 լուսանկարներից, որոնք արվել են 1937-1939 թվականների միջև: Նրանցից շատերը պատկերում են Հիտլերին՝ շրջապատված ընկերներով հանրահավաքների և կուսակցական միջոցառումների ժամանակ, կան նաև լուսանկարներ զինվորների հետ, հանգստի պահերին, այդ ժամանակի գերմանական ռազմաքաղաքական վերնախավի անդամների հետ և բնության այն վայրերում, որտեղ ֆյուրերը սիրում էր ժամանակ անցկացնել: