Փետրվարի 9-ին Ադրբեջանում կայացել են արտահերթ խորհրդարանական ընտրություններ. Ֆեյսբուքում իր հաղթանակի մասին է հայտարարել «Նոր Ադրբեջան» իշխող կուսակցության գործադիր քարտուղար Ալի Ահմեդովը: Թեմայի շուրջ զրուցելու համար «Առաջին լրատվական»-ը հյուրընկալել է Կովկասի ինստիտուտի փորձագետ, քաղաքագետ Հրանտ Միքայելյանին և «Օրբելի» կենտրոնի փորձագետ Տարոն Հովհաննիսյանին:
Արձագանքելով այն դիտարկմանը, որ ընտրությունների անցկացմանը հետևող իսրայելական պատվիրակության անդամ Ռոման Գուրևիչը Ադրբեջանի ընտրություններն անվանել է թափանցիկ՝ Տարոն Հովհաննիսյանը նկատեց. «Ադրբեջանի հետ կապ ունեցող այդպիսի ազգանուններով մարդիկ, ինչպես փորձն է ցույց տալիս, նախկինում Ադրբեջանից գնացած հրեաներ են, որոնց մեծ մասը սերտ կապեր է պահպանում Ադրբեջանի հետ: Կարծում եմ՝ գնից է կախված. կարող էր ավելի փայլուն ասել: Իսկ իրականում գրեթե բոլոր ընտրատեղամասերում տարբեր տեսակի ընտրախախտումներ են արձանագրվել, որոնք փաստվել են տեսանյութերով և լուսանկարներով»:
Նրա խոսքով՝ 125 պատգամավորներից 124-ը, եթե անգամ «Նոր Ադրբեջանից» չէ, միևնույն է՝ իշխանամետ է. «Եթե չեմ սխալվում՝ միայն մեկն է ընդդիմադիր, որն ինքնաառաջադրվել է: Բայց սա, կարծում եմ, ինչ-որ իմիտացիայի փորձ է: Այնուամենայնիվ, ես չեմ համարում, որ սա նոր խորհրդարան է կամ ինչ-որ որակական փոփոխություններ է կրել»:
Հրանտ Միքայելյանը ևս կարծում է, որ այս ընտրությունները ամբողջությամբ կեղծվել են, բայց մի տարբերությամբ նախորդ ընտրություններից. «Այս անգամ քչից-շատից հնարավոր կլինի արդյունքները հաշվել, և ես ենթադրում եմ, որ հնարավոր կլինի մաթեմատիկական մեթոդներով գոնե ինչ-որ չափով իրական պատկերը վերականգնել, որովհետև այս անգամ Ադրբեջանը փորձեց գործընթացն ավելի թափանցիկ դարձնել, ինչի մասին է վկայում նաև ձայնագրությունների շատ լինելը»:
Այս քարոզարշավում Ղարաբաղի թեմային առանձնապես չանդրադառնալը Հրանտ Միքայելյանը բացատրում է այն հանգամանքով, որ այս ընտրություններում իրական պայքար չի եղել. «Ուստի կարիք չկար Ղարաբաղի թեման առաջ քաշել, բացի դրանից՝ իսկապես Ադրբեջանի բնակչությանն այժմ ավելի շատ հետաքրքրում են սոցիալ-տնտեսական հարցերը, ինչը պայմանավորված է նրանով, որ վերջին 10 տարիներին Ադրբեջանի տնտեսությունը գրեթե աճ չի ունեցել»:
Հարցազրույցն ամբողջությամբ՝ տեսանյութում: