Դեռևս 2015 թվականի տարեվերջին պաշտոնական տվյալները փաստեցին, որ Հայաստանի Հանրապետությունում մշտական բնակչության թիվն այլևս չի հասնում 3 միլիոնի՝ 2 միլիոն 998 հազար, և շարունակելով նվազել, 2018 թվականի ապրիլի դրությամբ այն դարձավ 2 միլիոն 969 հազար մարդ։
Ինչպիսի՞ն են միգրացիոն տեմպերն այսօր, որովհետև վերջերս հրապարակած վիճակագրական տվյալների համաձայն՝ տեմպերն այնքան էլ ուրախալի չեն․ «Առաջին լրատվական»-ի հարցին տարածքային կառավարման և զարգացման նախարարության միգրացիոն ծառայության պետ Արմեն Ղազարյանը պատասխանեց․ «Ես ձեզ հետ պետք է չհամաձայնեմ, որովհետև տեմպերը բավականին դրական են։ Բանախոսները կփորձեն հակադարձեն՝ նշելով, որ մշտական բնակչության թիվը նվազում է։ Ես կուզեի շեշտել, որ մենք ունենք հաշվառման ու գրանցման հետ կապված խնդիրներ, որոնք պայմանավորված են մի շարք հանգամանքներով։ Առաջին հերթին պետք է նշեմ, որ մեզ մոտ օրենսդրությունը լիբերալ է՝ տարիներ շարունակ մարդիկ կարող են հեռանալ երկրից առանց հաշվառումից դուրս գալու, և հետո վերադառնալ ու դուրս գալ հաշվառումից»։
Դա նախկինում էլ է այդպես եղել, բայց արդյո՞ք մեզ այսօր պետք չէ հստակ վիճակագրական տվյալ՝ բնակչության քանակի, միգրացիոն տեմպերի, որպեսզի հասկանանք՝ որն է խնդիրը, և կարողանանք գտնել դրա լուծումները․ «Առաջին լրատվական»-ի հարցին Արմեն Ղազարյանը պատասխանեց․ «Իհարկե, մեզ պետք է հստակ վիճակագրական տվյալ այս ոլորտի առնչությամբ, բայց կան խնդիրներ, որոնք օբյեկտիվորեն մնացել են և պետք է հաղթահարվեն։ Մենք այդ գործընթացի մեջ ենք։ Իսկ պատճառն այն է, որ եթե մենք մարդկանց հաշվառումների ու գրանցումների համար ավելի խիստ ռեժիմներ ենք սահմանում, ապա ավելացնում ենք բյուրոկրատական քաշքշուկը, որը կարող է քաղաքացիների մոտ արդարացի վրդովմունք առաջացնել։ Ըստ այդմ՝ մենք պետք է գտնենք ոսկե միջինը»։
Մանրամասները՝ տեսանյութում։